Монголын улаан загалмай нийгэмлэг, БНХАУ-ын Улаан загалмай нийгэмлэгийн хамтран хэрэгжүүлж буй төсөлд хамрагдаж эрүүл болсон хүүхдүүд, эцэг эхийн төлөөлөл болон ахмадуудтай тус улсаас Монгол Улсад суугаа Элчин сайд, хатагтай Шэнь Миньжуань өнөөдөр уулзлаа. БНХАУ-ын Улаан загалмай нийгэмлэг, Улаан загалмай сан, Өвөр Монголын Өөртөө засах орны Улаан загалмай байгууллагатай хамтран 2017 оноос “Бүс ба зам-Сахиусан тэнгэрийн аялал” төслийг амжилттай хэрэгжүүлж, төрөлхийн зүрхний гажигтай 148 хүүхдийг мэс заслын эмчилгээнд хамруулжээ.
Мөн 2019 оноос хойш “Гэрэлт аялал” төслийн хүрээнд 540 хүнд нүдний болор суулгах хагалгааг амжилттай хийж, нүдний нарийн мэргэжлийн 20 эмч БНХАУ-д мэргэжил дээшлүүлэх сургалтад хамруулсан байна. Монголын улаан загалмай нийгэмлэгийн ерөнхийлөгч Б.Батцэцэг энэ арга хэмжээнд оролцож, БНХАУ-ын Улаан загалмай нийгэмлэг болон Элчин сайд Шэнь Миньжуаньд талархлаа илэрхийлж, хүрэлцэн ирсэн хүүхдүүд, ахмадуудад эрүүл энхийг хүссэн юм. ӨМӨЗО-ы Улаан загалмай байгууллагаас Анхны тусламжийн сургалтын төвийг байгуулахад нэг сая гаруй юаны үнэ бүхий тоног төхөөрөмж хандивлаж байж. Монголын улаан загалмай нийгэмлэг, ӨМӨЗО-ы Улаан загалмай байгууллагатай хамтран 2019-2024 онд анхны тусламжийн 600 сургагч багш бэлтгэсэн юм. Түүнчлэн өнгөрсөн оны зудын эрсдэлийг даван туулахад БНХАУ-ын Элчин сайдын яам, Улаан загалмай нийгэмлэгээс 460.4 сая төгрөгийн хүмүүнлэгийн тусламж үзүүлж, Архангай, Баянхонгор, Өвөрхангай, Төв аймгийн 15 суманд зудын гамшигт өртсөн 3000 малчин өрхөд малын эрдэс тэжээлийн болон хүнсний багц, дулаан хувцас олгосон аж.
.avif)
.avif)
