Эрүүл мэндийн салбарт хийгдэж буй бодлогуудын хэрэгжилтэд эмч нарын саналыг сонсох, асуултад нь хариулт өгөх зорилготой “Эмчээ сонсъё” өглөөний уулзалтыг Эрүүл мэндийн сайд Т.Мөнхсайхан зургаан өдөр зохион байгуулж, өнөөдөр дууслаа. Тус уулзалтыг танхим болон цахим байдлаар зохион байгуулж 800 орчим эмч нартай нүүр тулсан уулзалт хийв. Эмч нарын зүгээс даатгалын санхүүжилт, цалингийн асуудал, эмч нар ажлын байрандаа иргэд үйлчлүүлэгчдийн дарамтад өртөх, зураг видео авах байдлаар нэр хүндэд нь халдах нэмэгдэж буйг учирлаж байсан юм. Энэ үеэр Эрүүл мэндийн сайд Т.Мөнхсайхан “Эмч нарын цалин тодорхой хувиар сүүлийн дөрвөн жилд нэмэгдэж байгаа, хойшид ч нэмэгдэнэ. ЭМДС-ийн өрийг барагдуулж, үүсээд байгаа санхүүгийн асуудлыг бүрэн шийдвэрлэхээр ажиллаж байна. Эрүүл мэндийн салбарын эрх зүйн орчныг сайжруулах, Эрүүл мэндийн даатгалын сангийн тухай хуулийн төслүүдийг намрын чуулганаар хэлэлцүүлэхээр бэлтгэж байна. Эмч нарын нэр төр, биед нь халдах явдал ч газар авч байгааг хуулиар зохицуулдаг болно. Цаашид эмч, эмнэлгийн мэргэжилтний эрх зүйн байдал, нийгмийн асуудал, эрүүл мэнд, боловсролд нь илүү анхаарсан бодлого хэрэгжүүлж ажиллана” хэмээн онцлов.
.avif)
