Агаар дахь хорт бодис, хүнд металлууд өдөр тутмын аар саар, жижиг сажиг зүйлс хийхэд шаардлагатай байдаг ердийн гэж болох анхаарал хандуулах чадварыг хүртэл бууруулж, элдэв сатаарлаас биеэ хамгаалах, анхаарлаа төвлөрүүлэх, цаашлаад нийгмийн харилцаанд биеэ зөв зохистой авч явахад хүртэл саад тотгор болох эрсдэлтэйг судлаачид тогтоожээ.
“Nature Communications” сэтгүүлийн шинэ дугаарт нийтлэгдсэн судалгааны ажлын дүн мэдээнд онцолсноор туршилтад хамрагдсан 26 хүнийг бохир болон цэвэр агаартай орчинд нэг нэг цаг байлгахад дараа нь гаргасан ааш аяг, хандлага нь илэрхий ялгаатай байсан гэнэ.
Судалгааг ахалсан Английн Бирминхэмийн их сургуулийн доктор Томас Фахертийн дурдсанаар бохир агаарт нэг цаг байсан хүмүүсийн бусдын сэтгэл хөдлөлийг таних чадвар ч сул болсон байж. Түүний багийнхан богино хугацааны агаарын бохирдол болоод гэмт хэргийн тоон үзүүлэлт хоёрын дунд ямар нэг холбоо сэжим бий эсэхийг тогтоохоор ажиллаж байгаа аж. Ялангуяа Америкийн хотуудад агаарын чанар мууддаг хүйтэн, сэрүүний улиралд болон дараахан нь гэмт хэрэг өсдөг гэсэн албан бус судалгаа байдаг байна.
Агаарын бохирдол бол дэлхийн хэмжээнд олон нийтийн эрүүл мэндэд заналхийлэгч хамгийн аюултай үзэгдлийн нэг юм. Дэлхийн хэмжээнд зөвхөн дотор агаар бохироос болж жилд 4.2 сая хүн цагаасаа эрт амьсгал хураадаг гэсэн ДЭМБ-ын тооцоо бий.
.avif)
