2023 онд үйлдвэрийн ослын 408 тохиолдол улсын хэмжээнд гарч байсан бол өнгөрсөн онд 712 осол бүртгэгдэн, 40 гаруй хувиар өссөн үзүүлэлт гарчээ. Энэ нь нэг талдаа илрүүлэлт сайжирсантай холбоотой ч нөгөө талдаа үйлдвэрийн осол нэмэгдэж буйн дохио болж байгааг “Хөдөлмөрийн аюулгүй байдал, эрүүл ахуй -2025” чуулганы үеэр ХАБ-ын мэргэжилтнүүд хэлж байлаа. Гэр бүл, хөдөлмөр, нийгмийн хамгааллын яам, Эрчим хүчний яамнаас хамтран зохион байгуулсан уг чуулганд эрчим хүчний салбарын төрийн захиргааны байгууллага, төрийн болон төрийн өмчит компаниудын төлөөлөл, хөдөлмөрийн аюулгүй байдал, эрүүл ахуйн ажилтан, үйлдвэрчний эвлэл зэрэг 150 гаруй төлөөлөгчид оролцлоо. Эрчим хүчний салбарт хөдөлмөрийн аюулгүй байдлыг сахин хамгаалах, эрүүл аюулгүй орчныг бүрдүүлэхээр анхааран 2025 онд “ЭЕРЭГ ХАНДЛАГА-МАНЛАЙЛАЛ” уриаг дэвшүүлжээ. Өнгөрсөн оноос үйлдвэрийн ослын бүртгэлд шинэчлэл хийж, актыг цахимаар үйлддэг болсон. Ингэснээр үйлдвэрийн ослын илрүүлэлт нэмэгджээ. Үйлдвэрийн осол, мэргэжлээс шалтгаалах өвчний даатгалын сангаас урьдчилан сэргийлэх чиглэлт санхүүжилт гаргахад хязгаарлагдмал нөхцөлтэй хэвээр байна. Мөн осол, гэмтлийн тоог бууруулахад урьдчилан сэргийлэх, түүнд зарцуулах санхүүгийн эх үүсвэрийг тодорхой болгох шаардлагатай байна. Гэр бүл, хөдөлмөр, нийгмийн хамгааллын яам Хөдөлмөрийн аюулгүй байдал, эрүүл ахуйн тухай хуулийн шинэчилсэн найруулгын төслийг боловсруулж, УИХ-ын хаврын чуулганаар хэлэлцүүлэхээр ажиллаж байна.
.avif)
