“Сэтгэц-нийгмийн сэргээн засах төв”-ийг дүүрэг бүрт байгуулах шаардлагатай"

Гэмт хэргээс урьдчилан сэргийлэх ажлыг зохицуулах зөвлөлийн Ажлын алба Эрүүл мэндийн яам, Сэтгэцийн эрүүл мэндийн үндэсний төвтэй хамтран “Согтуурах, мансуурах донтой хүнийг эмчлэх эмчилгээний өнөөгийн нөхцөл байдал, цаашдын чиг хандлага” сэдэвт хэлэлцүүлэг (2025.04.01) зохион байгууллаа. Хэлэлцүүлгээр согтуурах, мансуурах донтой хүнд үзүүлж буй эмнэлгийн тусламж, үйлчилгээний одоогийн нөхцөл байдал, сайн дурын болон албадан эмчилгээ, эрүүлжүүлэх үйл ажиллагаа явуулахад тулгамдаж буй асуудал, шийдвэрлэх арга замын талаар салбарын төлөөллүүд санал солилцов. Ажлын албаны дарга Л.Нямгэрэл хэлэлцүүлгийг нээж хэлсэн үгэндээ “Согтуурах, мансуурах донтой хүнийг эмчилгээний дараа нийгэмшүүлэх нь хамгийн чухал асуудал болоод байна. Энэ ажлыг эрчимжүүлэхийн тулд хууль тогтоомжид зохицуулалт хийж, цаашлаад олон нийтэд түшиглэн “Сэтгэц-нийгмийн сэргээн засах төв”-ийг дүүрэг бүрт байгуулж, хүний нөөцийг чадавхжуулах шаардлагатай байна” гэлээ. Хэлэлцэх сэдвийн хүрээнд ЭМЯ-ны Эмнэлгийн тусламжийн бодлогын газрын дарга Р.Гантуяа, СЭМҮТ-ийн захирал Г.Анхболд, ШШГЕГ-ын Согтуурах, мансуурах донтой өвчтөнийг албадан эмчлэх, албадан хөдөлмөр хийлгэх газрын Харуул хамгаалалт эрхэлсэн дэд дарга, хошууч Д.Хатанзориг, НЦУГ-ын Эрүүлжүүлэх, саатуулах төвийн дарга, цагдаагийн хурандаа В.Ариунжаргал, “Сэтгэц-нийгмийн сэргээн засах төв”-ийн зөвлөх Н.Дэмидмаа, “Мон-Дэм” ТББ-ын Эмчилгээ эрхэлсэн дэд дарга нар О.Бямбадорж нар танилцуулга хийв. Сүүлийн жилүүдэд согтуурах, мансуурах донтой хүний тоо ихсэх хандлагатай байгаа тул нийслэл, орон нутгийн энэ төрлийн тусламж үйлчилгээний хүртээмжийг сайжруулж, хэвтэн эмчлүүлэх орны тоог нэмэх, хүний нөөцийг бэхжүүлж, мэргэжил арга зүйн дэмжлэг үзүүлэн, “Сэтгэц-нийгмийн сэргээн засах төв” байгуулахад хамтран ажиллах нь зүйтэй хэмээн оролцогчид санал нэгдлээ. “Согтуурах, мансуурах донтой хүнийг эмчлэх эмчилгээний өнөөгийн нөхцөл байдал, цаашдын чиг хандлага” хэлэлцүүлэгт Гэр бүл, хөдөлмөр нийгмийн хамгааллын яам, ШШГЕГ, ШШЕГ, ТТАХНЭ, НЦУГ, НЭМГ, ЭМХТ, НЭМҮТ, ЭЭХХЗГ, ГССҮТ, Аддиктологийн төв, “Сэтгэц-нийгмийн сэргээн засах төв” зэрэг холбогдох байгууллагуудаас 70 гаруй төлөөлөл оролцлоо.