Улсын хэмжээнд улаанбурхан өвчний тархалт өндөр байгааг ЭМЯ, ХӨСҮТ-өөс өдөр бүр анхааруулсаар, эмч мэргэжилтнүүд борви бохисхийх завгүй, амралтгүй ажиллаж байна. Хоногт 30-40 тохиолдол бүртгэгдэж өвчний хавьтал найман мянга руу дөхөж байгаа. Мөн салхин цэцэг, менингококкт халдвар ихсэж байгааг өнөө өглөөхөн мэдээллээ.Тиймээс эрүүл мэндийн байгууллагууд анги болгоноор нэг бүрчлэн орж хүүхэд болгоноос вакцины ягаан дэвтэр нэхэж буй. Ингэж хэрэв вакцин хийлгээгүй бол нөхөн дархлаажуулж байгаа хэрэг. Улаанбурхан өвчний тархалтаас болж Өмнөговь, Дундговь аймгууд сургууль, цэцэрлэгээ цахимд шилжүүлээд байсан нь саяхан.
Тэр тусмаа ХӨСҮТ-өөс улаанбурхан өвчнийг ерөнхий боловсролын сургуульд голомтлон тархаж байгаа нь илүү өндөр эрсдлийг дагуулж буй. Магадгүй зарим үед дөрвөн ч тохиолдол бүртгэгдээд буй менингококкт халдвартай хавсрах вий гэсэн айдас болгоомжлол бий.
Улаанбурхан нь агаар дуслын замаар буюу халдвартай хүн ханиаж найтаах төдийд маш амархан халдварлана. Халдварлах чадавхиараа хамгийн өндөрт ордог өвчний нэг бөгөөд халдварлалтын индекс нь 96-98 хувь юм. Улаанбурханаар өвдсөн 5 хүн тутмын 1 нь буюу тэр дундаа хүүхдүүд хүндрэх, эндэх эрсдэлтэй.Тиймээс бүгд амны хаалтаа буцаад зүүх цаг ирлээ гэдгийг эмч мэргэжилтнүүд сэрэмжлүүлсээр байгаа юм.
Гэтэл халдварт өвчний тархалт ийм өндөр, хүн бүхэн айдастай байхад НИТХ-аас маргааш хэдэн мянган хүүхдийг цуглуулж шүлэг уншуулах гэж байна.
Бүр тодруулбал, энэ сарын 4-нд Сүхбаатарын талбайд 3333 сурагч "Тусгаар тогтнол" шүлгийг уншина. Гэхдээ зөвхөн маргааш төв талбай дээр цуглах биш юм. Хэд долоо хоногийн өмнөөс давтуулж бэлдүүлэх гэж баахан нааш цааш нь явуулж, цуглуулж тараасан нь лав. Энэ болгонд автобус унаанд суухаас эхлээд эрсдэл дагуулна. Арга хэмжээний талаар "Оюуны ундраа" сургуулийн захирал С.Нэргүйдаваа "Манай сургуулиас үндэсний хэмжээг хамарсан хөтөлбөр болгон хөгжүүлж байна. Энэ удаа зөвхөн нийслэлд төдийгүй 21 аймгийн төв талбайд тус шүлгийг нэг цагт, нэгэн зэрэг уншихаар төлөвлөөд байна. Мөн Монголын эзэнт гүрний нийслэл Хархорум, их зохиолчийн төрсөн Монгол Улсын төв цэг Бүрд сумдад уншина. Тиймээс бид "Оюуны ундраа" сургуулийн ахлах ангийн сурагчдыг баг болгон 21 аймгийн зүг илгээж байна” гэж ярьжээ.
Тэгэхээр нэг сургуулийн нэрээр халхавчилсан эх оронч нэртэй цугларалт улс орон даяар болох нь. Эдгээр хүүхдүүдээр дамжиж гэр бүл ойр тойрныхон нь хүртэл халдвар авах боломжтой. Үүнд цөөнгүй эцэг эхчүүд дургүйцэж үр хүүхдээ эрсдэлд оруулмааргүй байна хэмээн гомдолтой буйгаа илэрхийлж байна. Ингэж хэдэн мянган хүүхдийг нэг дор цуглуулах нь хэр эрсдэлтэй талаар ЭМЯ-наас тодруулахад “ХӨСҮТ-өөс бүх шатны байгууллагад халдварт өвчний тухай зөвлөмж хүргүүлдэг” гэсэн тайлбарыг хэлсэн бол НЭМГ-ын дарга нь энэ үйл ажиллагааны талаар огт мэдээлэлгүй байв. Харин НИТХ-ын хэвлэлийн төлөөлөгчөөс тодруулахад “Бид яам, НЭМГ-ын зөвлөмжийг дагаж байгаа. Ер нь олон хүн цуглуулахыг хориглосон захирамж шийдвэр нь хаана байгаа вэ. Энэ бол ес дэх жилдээ зохион байгуулж байгаа арга хэмжээ” гэлээ. Ер нь бол нэг талд нь төр нь ажил амралтгүй ажиллаж вакцины эрэлд хатаж байхад нөгөө талд эрх бүхий албан тушаалтнууд нь эрсдлийг улам нэмэгдүүлдэг байж боломгүй. Төрийн байгууллагуудын уялдаа холбоо ямар байгааг энэ мэтээр харж болно.
Эндээс харвал улс орон даяар хэдэн мянган хүүхдийг цуглуулж эрүүл мэнд цаашлаад амь насыг нь эрсдэлд оруулж буйн хариуцлагыг НИТХ-ын дарга А.Баяр хариуцах уу. Үнэхээр эрүүл мэндийн байгууллагын байгууллагын заавар зөвлөмжийг дагаж байгаа бол бүгдийг нь масктай шүлэг унших уу гэдэг асуудал яригдах нь. Үгүй бол хэдэн мянган хүүхдийн амь нас эрүүл мэнд эрсдэлд орсныг өдий хүртэл мэдээгүй сууж байгаа НЭМГ-ын дарга ороогдох уу.
.avif)
.avif)
