.avif)
Дэлхийн жилийн дундаж температур одоогийнхоосоо цельсийн ердөө дөрвөн градусаар нэмэгдэхэд дундаж давхаргынхны орлого 40 хувиар буурч, төдий хэрээр доод давхарга болоод ядуусын эгнээнд шилжинэ гэсэн эдийн засгийн урьдчилсан тооцоолол гарчээ. Энэ нь зарим мэргэжлийн улсын өмнөх тооцооллоос бараг дөрөв дахин өссөн дүн гэнэ.
“Environmental Research Letters” сэтгүүлийн шинэ дугаарт нийтлэгдсэн дээрх судалгааг Австралийн Нью Саут Уэльсийн Уур амьсгалын эрсдэлийн судалгааны хүрээлэнгийнхэн хийсэн байна. Судалгааны багийг ахалсан доктор Тимоти Нилийн онцолсноор уур амьсгалын өөрчлөлт, дэлхийн дулаарлыг санхүү, эдийн засгийн өсөлттэй холбон судалсан өмнөх хэд хэдэн судалгаанд дундаж иргэдийг ойролцоогоор 11 хувиар ядуурна гэсэн дүн мэдээ дийлэнхдээ гарч байж. Харин дээрх 40 хувь гэсэн үзүүлэлт бодит байдал санаснаас дор байгааг харуулж байна.
Гэнэтийн хэт дулаарлаас болж ган гачиг газар авна, тэр хэрээр ургац буурна. Харин хүчтэй шуурга, хуй, хар салхи, үер уснаас болж газар тариалангийн нутгууд сүйдэж, хүнсний эрэлт нийлүүлэлтийн сүлжээнд доголдол үүсэж, иргэдийн ашиг орлого багасна. Хэт халуун мөн хүний эрүүл мэндэд олон талаар сөргөөр нөлөөлөх тул ажлын хүчин хомсдох, цагаач дүрвэгчдийн хэтийдсэн урсгал бий болох, цаашлаад зөрчил мөргөлдөөн, дайн самуун дэгдэх эрсдэл ч нэмэгдэнэ гэж судалгааны багийнхан онцолжээ.
.avif)
