Хүн амын тоо болон эдийн засгийн хөгжлөөрөө Их Британидаа хоёрт ордог Английн Бирминхэм хот хогондоо дарагдаж, аварга том мэрэгч амьтдаар дүүрчээ. Шинэ он гарснаас хойш хотын гудамж талбайд байх том хогийн савуудыг ачиж, цэвэрлэдэг 400 гаруй ажилтан ойр ойрхон ажил хаях болсон нь энэ нөхцөл байдалд хүргэсэн байна. Хотын захиргаа хот тохижуулалтын газрыг хариуцдаг үйлдвэрчний эвлэлтэй удаа дараа санал зөрөлдөн, ажилчдын тоог цөөлнө, цалин хөлсийг нь хасна гэж мэдэгдсээр байгаа аж.
1.8 метр өндөр хогийн том савуудыг зөөх, цэвэрлэх хүний тоо цөөрч, хот хаа сайгүй хогон овоолготой болсноос хойш Бирминхэм хотын захиргаа, хот тохижилтын газарт ирэх гомдол, саналын тоо 75 хувиар өссөн байна. Иргэдийн дийлэнх нь оготно, зурам мэтийн мэрэгч амьтад олширсон, гэрийнх нь ойр орчмоос өмхий муухай үнэр үнэртэх болсон гэж гомдолложээ.
Өмнө нь 2017, 2019 онд хот тохижилтынхон мөн ажил хаяж байсан ч байдал одоогийнх шиг ингэтлээ дордож байгаагүй аж. Хотын захиргаа үйлдвэрчний эвлэлтэй хэл амаа олохын тулд Засгийн газраасаа тусламж хүсээд байгаа гэнэ.
.avif)
