Хэт хуурайших, хэт их хур тунадас орох гэсэн эсрэг тэсрэг цаг агаарын дунд уур амьсгалын огцом шилжилт буюу “ташуурт” үзэгдэл гэж мэргэжилтнүүдийн нэрийддэг байгалийн гамшиг жилээс жилд нэмэгдсээр байгааг судалгаагаар тогтоожээ. Энэ нь дэлхийн дулааралтай шууд холбоотой бөгөөд байгалийн ердийн гэж болох үзэгдэл дангаараа нүүрлэхээс ч илүү хор хохирол учруулахаар байна.
Зүүн Африк, Пакистан, Австралид сүүлийн хэдэн жилд үер усны гамшгийн давтамж ойртсон; Хятад, Европт гэнэт хэт их халах нь газар авсан; хамгийн сүүлд л гэхэд Америкийн Лос Анжелес хотын ойр орчим тэр чигтээ асар их бүс нутгийг хамарсан гэнэтийн түймэрт өртсөн зэрэг нь бүгд энэхүү “ташуурт” үзэгдлийн нэг хэсэг гэнэ.
“Nature Reviews Earth and Environment” сэтгүүлд нийтлэгдсэн шинэхэн судалгааны дүн мэдээнд онцолсноор өнгөрөгч зууны дунд үеэс хойш дэлхийн хэмжээнд ийм гэнэт халуун, гэнэт хүйтэн болох цочир хэлбэлзлээс шалтгаалсан ташуурдах мэт гялсхийн өрнөх байгалийн гамшигт үзэгдэл 31-66 хувиар өссөн байна.
Хэрэв дэлхийн дундаж температур одоогийнхоосоо цельсийн гурван градусаар нэмэгдвэл ийм гэнэтийн цочир гамшигт үзэгдэл бүр хоёр дахин нэмэгдэх төлөвтэй гэнэ. Ийм үзэгдлийг энгийн үгээр тайлбарлавал агаар мандал улам халахынхаа хэрээр илүү их уур буюу чийг агуулна, энэ нь хэт их хур бороо, түүнийг дагасан ган гачгийн шалтгаан болно гэсэн үг юм.
.avif)
.avif)
