“Цэвэр дулаан хангамжийн хөрөнгө оруулалтыг нэмэгдүүлж эрчим хүчний шилжилтийг дэмжих” төсөл Монгол Улсад анх удаа хэрэгжинэ. Тус төслийн хүрээнд 25 сая долларын буцалтгүй тусламжаар Дорноговь аймгийн Сайншанд хотод 10 МВт-ын нарны дулааны эх үүсвэрийг 2025 – 2028 оны хооронд барьж байгуулах юм.
Төслийн хүрээнд 45,000 иргэн цэвэр дулаан хангамжид холбогдож, 12,000 иргэн жилийн дөрвөн улиралд хэрэглээний халуун усыг цэвэр эх үүсвэрээс авах боломж бүрдэж байна.
Үүнтэй холбоотойгоор “Цэвэр дулаан хангамжийн хөрөнгө оруулалтыг нэмэгдүүлж эрчим хүчний шилжилтийг дэмжих” төслийн чадавхыг бэхжүүлэх сургалт боллоо. Тус сургалтыг Эрчим хүчний яам болон Даян Дэлхийн ногоон хөгжлийн институт (GGGI) хамтран зохион байгуулав. Тус сургалтад орон нутаг болон Улаанбаатар хотод үйл ажиллагаа явуулж буй эрчим хүчний салбарын төрийн өмчийн үйлдвэр компаниудаас 100 гаруй инженер техникийн ажилчид танхимаар болон цахимаар хамрагдсан юм.
Сургалтаар нарны хэсэгчилсэн дулааны станц байгуулах, ашиглах дотоодын чадавх, хүний нөөцийн мэдлэгийг дээшлүүлэх зорилгын хүрээнд нарнаас дулааны эрчим хүчийг үйлдвэрлэх технологийн харьцуулалтыг танилцуулан, Сайншанд хотын дулааны эх үүсвэр болох “Чандмань Илч” ХХК-ийн дэд бүтцийг ашиглан хэрхэн цэвэр дулааныг хэрэглэгчдэд хүргэх Техник Эдийн Засгийн Үндэслэлийг танилцуулав.
.avif)
.avif)
