Шинэ он гараад ердөө арав хонож байгаа авч дэлхийн хүн амын ердөө нэг хувийг бүрдүүлдэг хамгийн баян чинээлэг хүмүүс нэг жилийн хугацаанд ялгаруулах учиртай нүүрстөрөгчөө хэдийнээ ялгаруулаад дуусчээ. Британид төвтэй “Oxfam” байгууллагын тооцоогоор дэлхийн тэргүүн баячууд энэ хэдхэн хоногт агаар мандалд 2.1 тонн нүүрстөрөгчийн давхар исэл цацаад байгаа аж.
Гэтэл хөрөнгө мөнгөөрөө хамгийн адагт бичигдэх дэлхийн хүн амын 50 хувийг эзлэх хүмүүс ийм хэмжээний хорт хийг бүтэн гурван жилд ялгаруулдаг байна.
Нүүрстөрөгчийн давхар исэл нь нүүрс, байгалийн хий, газрын тосыг шатаах үед ялгардаг хорт хий бөгөөд агаар мандалд хуримтлагдсанаар дэлхийд ирэх нарны илч дулааныг эргээд задгай сансар луу сарниж үгүй болоход нь саад хийж, 10 мянга гаруй жил тогтвортой байж ирсэн агаар мандлын тогтолцоог эвдэх болсон юм. Чухам үүнээс шалтгаалж дэлхийн дундаж температур жилээс жилд өсөж, дулаарлаас болж байгалийн гамшгийн давтамж нэмэгдэх болсон. Олон улс дэлхийн жилийн дундаж температурын өсөлтийг цельсийн 1.5 градусаас нэмэхгүй байхад анхаарч нүүрстөрөгч, хүлэмжийн хийн ялгарлыг бууруулахаар хичээж байгаа.
Гэтэл дэлхийн хүн амын нэг хувь буюу хамгийн хөрөнгө мөнгөтэй гэх 77 сая орчим хүн жил бүр дэлхийн хүн амын тэн хагасаас бүр 2-3 дахин их нүүрстөрөгч ялгаруулсаар, тэдний дам үйлдлийн гол хохирогчид нь хамгийн ядуу буурай хүмүүс болсоор байна.
“Oxfam” болон Стокхольмын байгаль орчны хүрээлэнгийн хамтарсан судалгаагаар мөнөөх нэг хувийнхны ялгаруулдаг нүүрстөрөгчийн давхар исэл дангаараа ирэх хэдэн жилд хэт халуунаас болж амиа алдах 1.3 сая хүний үхэлд шууд нөлөөлөхүйц хортой байна гэсэн тооцоо гарчээ. Дэлхийн хамгийн баян хүмүүс хүн төрөлхтөнд ногдох бүтэн жилийн “нүүрстөрөгчийн төсөв”-ийг дэндүү богино хугацаанд үрэн таран хийж ирснийг мэргэжилтнүүд дараах хоёр жишээгээр тайлбарласан байна.
“Amazon” компанийн үүсгэн байгуулагч Жефф Безосын хувийн хоёрхон онгоц л гэхэд жилийн 25 өдрийг агаарт өнгөрүүлэхдээ “Amazon”-ий жирийн нэг америк ажилчны 207 жилд ялгаруулах нүүрстөрөгч ялгаруулжээ. Харин “Walmart” сүлжээ дэлгүүрийг эзэмшигч Уалтоны гэр бүлийн хувийн гурван хөлөг онгоц жилд 18 мянган тонн нүүрстөрөгч ялгаруулсан байх жишээтэй.
2030 он хүртэл дэлхийн жилийн дундаж температурын өсөлтийг цельсийн 1.5 градуст торгоон барих зорилтыг биелүүлэхийн тулд дэлхийн хамгийн хөрөнгө мөнгөтэй хүмүүс хэрэгцээгээ танаж, нүүрстөрөгчийн ялгарлаа одоогийнхоосоо 97 хүртэлх хувиар хасах хэрэгтэй байтал хамгийн дээд тал нь ердөө таван хувь л багасгах тооцоо гарсан аж. Дээрх судалгааг хийсэн уур амьсгалын мэргэжилтнүүд хөгжингүй, чинээлэг орнуудын эрх баригчдаас хувийн онгоц, супер хөлөг онгоцтой баячуулд уур амьсгалын татвар гэсэн тусгай татвар ногдуулахыг шаардаж, уриалж ухуулсаар ирсэн боловч дорвитой үр дүнд хүрэхгүй байгаагаа мөн давхар дурдсан байна.
.avif)
.avif)
