НҮБ-аас тэмдэглэдэг Олон улсын Аз жаргалын өдрийг тохиолдуулан тус байгууллагын санхүүжилтээр хийгддэг Дэлхийн аз жаргалын индекс гэх судалгаа 13 дахь жилдээ дүнгээ танилцуулсан байна. Жагсаалтыг Финланд улс найм дахь жилдээ дараалан тэргүүлсэн бол араас нь мөн л Скандинавын гурван улс Дани, Исланд, Швед бичигджээ. Харин Коста Рика, Мексик гэсэн Латин Америкийн хоёр улс анх удаа эхний 10-д орж ирсэн бол Их Британи, АНУ 23, 24-т жагссан байна. Энэ нь Америкийн хувьд урьд байгаагүй хамгийн доогуур үзүүлэлт бөгөөд анх удаа эхний 20-иос мултарсан нь энэ гэнэ.
Жагсаалтыг тухайн улс, нийгмийн тэгш байдал, нэг хүнд ногдох ДНБ-ий хувь, иргэний эрх чөлөө, олны өгөөмөр хандлага, сэтгэл зүйн таатай мэдрэмж, хандивын хэмжээ, сайн дурын ажил зэргийг судалсны үндсэн дээр гаргажээ.
Индексийг гаргахад ашигласан хэд хэдэн судалгаанаас харахад хүмүүсийн дийлэнх нь ойр дотныхноосоо илүү танихгүй хүмүүсээс өгөөмөр сэтгэл мэдэрдэг, эргэн тойрондоо тусч хүмүүс байхыг мэдэх нь аюулгүй, аз жаргалтай мэдрэмж төрүүлдэг гэсэн байна. Дэлхийн аз жаргалын индексийг гаргасан ажлын багийн ахлагч, Бритиш Колумбиягийн их сургуулийн эдийн засагч Жон Ф.Хеллиуэллийн онцолсноор Скандинавын орнууд уг жагсаалтыг үргэлж тэргүүлж ирсний гол шалтгаан нь иргэн бүрд ээлтэй нийгмийн халамжийн бодлогоос гадна иргэдийнх нь эв нэгдлийг эрхэмлэсэн, материаллаг эд зүйлийг шүтэхийн оронд шударга ёсыг дээдэлсэн хандлага, өндөр ёс суртахуун гэнэ. Тэрээр олон арван жил гээгдсэн түрүүвчний судалгаа гэх ажиглалт, туршилт явуулсан бөгөөд дээрх орнуудын иргэд бусад улс орныхноос илүү өрөөл бусдыг гэсэн сэтгэлтэй, хүний эд зүйлийг заавал эзэнд нь буцааж өгөх ёстой гэсэн хүмүүжилтэй нь илэрхий байдаг аж. Тиймдээ ч энэ нь тайван амгалан, бусдад итгэх итгэл дүүрэн, аз жаргалтай иргэдийг, эрүүл нийгмийг бүтээдэг болохыг Хеллиуэлл тодотгожээ.
Жагсаалтын сүүлд Зимбабве, Малави, Ливан, Сьерра Леон жагсаж, Афганистан улс сүүл мушгисан байна.
Харин манай улс нийт 147 орноос 77-д бичигдсэн бол Орос 66, Хятад 68-д оржээ.
.avif)
