Хьюстон хотод болсон Сар, гараг эрхэс судлалын олон улсын чуулга уулзалтад оролцохоор ирсэн нэгэн франц эрдэмтнийг Америкийн хилийн албаныхан байцааж, гар утсыг нь шалган, Дональд Трампыг шүүмжилсэн хэд хэдэн зурвас утаснаас нь олдсон гэх шалтгаанаар хилээс буцаасан талаар Францын Боловсрол, судалгааны яамнаас мэдээлжээ.
Францын Засгийн газар уг мэдэгдэлдээ “Үзэл бодлоо илэрхийлэх, үг хэлэх эрх чөлөө, эрдэм шинжилгээний ажил хийх эрх зэрэг нь Францын төр засаг, ард түмний эрхэмлэн дээдэлдэг үнэт зүйлс юм” хэмээн онцолсон байна.
Дээрх явдал энэ сарын 9-ний өдөр болжээ.
Францын Боловсрол, судалгааны сайд Филипп Баптист Трампын засаглалыг болон Элон Маскийг, мөн шинжлэх ухааны судалгааны салбар дахь хөрөнгө оруулалтыг ханаж танах бодлогыг нь ил тод бөгөөд удаа дараа шүүмжилж ирсэн байна. Тиймээс ч франц эрдэмтдийг онцгойлон “онилж”, виз түдгэлзүүлэх нь хүртэл нэмэгдсэн гэж Францын Засгийн газраас гомдол гаргажээ. Дээрх эрдэмтнийг хилээс албадан нутаг буцаахын өмнө түүнд Холбооны мөрдөх товчоо хэрэг үүсгэсэн гэж Америкийн албаныхан хэлсэн гэх мэдээ ч байгаа юм.
.avif)
