Өнгөрсөн арванхоёрдугаар сард Башар аль-Ассадын дэглэм нуран унаснаас хойш түүний харьялагддаг алавит урсгалын эгэл жирийн иргэдийг хавчин гадуурхах, ажлаас нь халах, мөрдөн мөшгөх нь газар авсаар улмаар нутгийн баруун захад голдуу төвлөрөн суудаг иргэдийг гэр бүлээр нь хүйс тэмтэрсэн хэрэг гарчээ.
Их Британид төвтэй, Сирийн дайны явцыг судалдаг байгууллага болон хэд хэдэн эх сурвалжийн мэдээгээр Сирийн тусгай албаныхан өнгөрсөн баасан, бямба гарагт 830 гаруй алавит иргэдийг хөнөөсөн байна. Гэхдээ амь үрэгдэгсдийн тоо 1000 давсан байх магадлал өндөр гэнэ.
Нутгийн баруун хойдын зарим буйд тосгон, сууринд алавит иргэдийг бүр хүүхэд, хөгшид ялгалгүй гэр бүлээр нь хүйс тэмтэрсэн гэсэн мэдээ байгаа аж.
Харин Сирийн удирдагч Ахмед аль-Шараа энгийн иргэдийг хөнөөсөн гэмт этгээдүүдийг хатуу шийтгэхээ мэдэгдсэн байна. Гэсэн ч тэрээр Ассадад үнэнч цэрэг армийнхантай тооцоо бодно гэж мөн анхааруулжээ.
Сирийн шинэ тусгай албаны 231 алба хаагч, Ассадыг дэмжигч гэх 250 гаруй босогч үймээн самууны үеэр алагдсан гэсэн мэдээ бас байгаа аж. Хэрэв энэ мэдээлэл үнэн бол зөвхөн алавит урсгалыг дагагч байсныхаа төлөө өнгөрсөн долоо хоногт 1311 хүн амиа алдсан гэсэн үг юм.
Исламын шийт урсгалаас салаалсан алавитууд Сирийн хүн амын 10 хувийг эзэлдэг байна.
.avif)
