Филиппиний Ерөнхийлөгч асан Родриго Дутерте Нидерландын Гааг хот дахь Олон улсын эрүүгийн шүүхэд албан ёсоор хүргэгджээ. Түүнийг хар тамхитай тэмцэх дайны нэрээр мянга мянган хүнийг хөнөөсөн хэмээн буруутгаж байгаа юм. Энэ жил 79 настай Дутерте “хүн төрөлхтний эсрэг гэмт хэрэг” үйлдсэн хэмээн буруутгагдаж, Олон улсын эрүүгийн шүүхээр шүүгдэх Азийн анхны экс удирдагч болж байна.
2016-2022 онд засгийн эрх барьсан тэрээр хар тамхи, мансууруулах бодистой тэмцэх нэрээр анх удаа хэрэгт холбогдогч юм уу, давтан хэрэг үйлдэгч, ганц удаагийн хэрэглэгч юм уу, ердийн зуучлагч зэргийг нь үл ялган хэдэн мянган залуусыг ямар ч шүүх хуралгүйгээр шийтгэж, хороосон гэгдэж байгаа.
Дутертег дэмжигчид харин түүнийг Филиппиний нийгэмд тахал болох шахсан мансууруулах бодисын наймаа, хэрэглээг хазаарлаж чадсан, гэмгүй залуусыг хөнөөсөн гэдэг нь сөрөг хүчнийхний явуулга гэж үзэж байгаа аж. Дэмжигчид нь Олон улсын эрүүгийн шүүхийн байрны гадаа эсэргүүцлээ илэрхийлэн жагссаар байна.
Дутертегийн гол өрсөлдөгч, Филиппиний одоогийн Ерөнхийлөгч Фердинанд Маркос түүнийг Олон улсын эрүүгийн шүүхэд хүлээлгэн өгсөн гол хүн бөгөөд 2022 оны сонгуульд эвсэл бүрдүүлэн орж байсан Маркос болон Дутертегийн гэр бүлийнхэн ашиг сонирхлын зөрчлөөс болж хагаралдсан тул Маркос Дутертег Гаагын албаныханд барьж өгчээ. Дутертегийн охин, Филиппиний одоогийн Дэд ерөнхийлөгч Сара Дутерте өчигдөр Нидерландыг зорьсон байна.
.avif)
