Польш, Эстони, Латви, Литвийн Батлан хамгаалахын сайд нар хамтарсан мэдэгдэл гаргаж зэвсэгт мөргөлдөөн, дайн тулааны үеэр барилга байшин, дэд бүтэц, байлдааны машин техник гэхээсээ цэрэг устгахад чиглэсэн амьд хүчин устгагч газрын миныг хориглосон Оттавагийн гэгдэх олон улсын тунхгаас гарах гэж буйгаа албан ёсоор зарлалаа.
Эдгээр улс энэхүү гэнэтийн шийдвэрээ ОХУ болон түүний холбоотон орон Беларусын зүгээс аюул заналхийлж, өдөөн хатгах нь нэмэгдсэний учир хэмээн тайлбарласан байна.
Түүнчлэн Зэвсэгт хүчнийхэндээ НАТО-гийн зүүн хилийг сахин хамгаалахад нь “аль болох олон төрлийн сонголт олгохыг хүссэн” гэж тодотгожээ.
1997 онд батлагдсан Оттавагийн тунхгийг мөн Минын хоригийн тунхаг гэж нэрийддэг юм. Уг тунхагт 160 гаруй улс гишүүнээр элссэн ч Хятад, Энэтхэг, Орос, Пакистан, Америк зэрэг зэр зэвсгийн хүчээрээ дэлхийд тэргүүлдэг орнууд одоог хүртэл нэгдээгүй байна. Харин Бальтын гурван улс 2005 онд, Польш улс 2012 онд гишүүн нь болжээ.
Эдгээр орны Батлан хамгаалахын сайд нар дээрх хамтарсан мэдэгдэлдээ “Энэ шийдвэрээрээ бид дайсагнагч орнуудад өөрсдийгөө улс орноо хамгаалахад бэлэн гэдгээ харуулахыг зорьсон. Бид газар нутаг, эрх чөлөөгөө хамгаалахын тулд боломжит бүхнийг хийнэ” хэмээн онцолсон байна.
Гэхдээ Оттавагийн тунхгаас гарлаа ч олон улсын хүмүүнлэгийн хууль журам, тогтоолуудыг дагаж мөрдсөөр байна гэдгээ мэдэгджээ.
Дээрх дөрвөн улс бүгд НАТО-гийн холбоотон бөгөөд бүгд ОХУ-тай хиллэдэг юм.
.avif)
