“Эрдэнэс Тавантолгой” компаниас өнөөдөр сэтгүүлчдэд мэдээлэл өгөхдөө түүхий эдийн үнэ буурч байгааг онцлов. Хятадын Ганцмод боомт дээрх түүхий коксжих нүүрсний үнэ 2024 оны эхэнд тонн тутамдаа 224 ам.доллар байсан бол 12 удаа унаж, энэ оны эхэнд 125 ам.доллар болж 44 хувиар буураад байна. 2025 онд нүүрсний үнэ оны эхний хагаст бууралттай байх бол үүнээс хойш тогтворжиж, улмаар хоёрдугаар хагасаас бага зэрэг сэргэн, оны эхний түвшнээс 15-20 хувиар өсөх хандлагатай хэмээн таамаглаж буй аж.
Цаашдаа буюу ирэх хоёр жилд үнэ харьцангуй тогтвортой байх бол 2028 онд өмнөх онтой харьцуулахад 17 хувиар нэмэгдсэнээр буцаад өсөлтийн цикл рүү шилжих хандлага давамгайлж байгааг тэд хэлэв.
Энэ талаар тус компанийн Борлуулалт, маркетинг, тээврийн газрын дарга О.Цэрэндондог “Бидний нүүрсээ нийлүүлж буй Хятадын зах зээлд жилдээ 4.5 тэрбум тонн нүүрс үйлдвэрлэж, бас гаднаас авдаг том хэрэглэгч. Энэ бол дэлхийн нүүрсний үйлдвэрлэлийн 50 хувь гэсэн үг. Манай компани өнгөрсөн онд 30.4 сая тонн нүүрсийг тус улс руу экспортлосон. Монгол Улс нийтдээ жилд 78 сая тонныг урд хөрш рүү гаргасан гээд тооцож үзээрэй. Үнэ буурч байгаа тухайд Хятадын эдийн засаг сайнгүй, өсөлт саарч буйг эх сурвалжууд хэлж байна. 2008 оны хямралын дараа тус улсын Засгийн газраас дэд бүтцийн томоохон хөрөнгө оруулалтуудыг эхлүүлсэн. Ингээд 2020 оноос эдгээрт шаардлагатай гангийн хэрэгцээ ерөнхийдөө багассан. Нөгөө талаас Хятад, Америкийн худалдааны дайнтай холбоотойгоор манай өмнөд хөршийн гангийн экспортод АНУ 20 хувийн татвар тавьсантай холбоотой. Хятадын жилд үйлдвэрлэх гангийн хэмжээ нэг тэрбум тонн. Гангийн үйлдвэрлэл нь 10 хувиар буурахад л нүүрсний үнэд нөлөөлнө. Гэхдээ зөвхөн манайхаас авч буй нүүрсний үнэ буураагүй. Нийт үйлдвэрлэлийнх нь 54 хувийг хамаарах Хятадын өмнөд болон хойд бүсэд нүүрсний өртөг, зардал буурч байгаа нь ч бас нөлөөлж байгаа. Иймд бид олон талыг бодолцон зөв, оновчтой бодлого баримтлах ёстой” хэмээн байр сууриа илэрхийлсэн юм.
.avif)
.avif)
