Тус улсын Либерал намын тэргүүнээр сонгогдож, 12 жил Засгийн газар тэргүүлсэн Жастин Трюдогийн халааг аван шинэ Ерөнхий сайд болох нь тодорхой болсон Марк Карни Америкийн Ерөнхийлөгч Дональд Трампын улс орных нь эсрэг явуулж эхэлсэн худалдааны дайнд ялахаа амлалаа. Энэ жил 59 настай, Канадын банк болон Английн банкны Ерөнхийлөгчөөр ажиллаж байсан Карни эдийн засагч мэргэжилтэй бөгөөд Трампад хандан “Бид хоккейд үргэлж ялдаг шигээ худалдааны дайнд ч мөн ялна” гэсэн байна.
Тэрээр хэдхэн өдрийн дараа Ерөнхий сайдын тангараг өргөх аж. Мөн ойрын хугацаанд болох Канадын парламентын ээлжит сонгуульд либералуудыг тэргүүлэн орохоор болж байна. Карни өмнө нь сонгуульт ажил хашиж байгаагүй авч намын тэргүүний сунгаанд нийт 85.9 хувийн саналаар ялалт байгуулжээ.
Трампын Засгийн газар Канадын бараа бүтээгдэхүүнд 25 хувийн тариф ногдуулаад байгаа юм.
Ажиглагчид Карнийг Трюдотой харьцуулахад илүү төвийг сахьсан үзэлтэй гэж үздэг. Канадыг Америкийн 51 дэх муж болгоно гэж мэдэгдсээр байгаа Трампыг сөрж зогсохоос гадна олон жил гацаанд байгаа байгалийн хийн хоолойн төслийг урагшлуулах, эрчим хүчний аль болох байгальд ээлтэй эх үүсвэрийг түгээх зэрэг ажлууд түүнийг хүлээж байна. Карни мөрийн хөтөлбөртөө Канадын томоохон мужууд хоорондох худалдааны урсгалыг нэмэгдүүлнэ, иргэдийг байр сууцаар хангах хөтөлбөр хэрэгжүүлнэ, Трюдогийн засаглалын жилүүдэд бараг 40 хувиар томорсон холбооны Засгийн газрын данхгар бүтцийг багасгана гэж мөн амлажээ.
.avif)
