.webp)
Дональд Трампын тарифын шинэ журмыг эсэргүүцэн Канадын зоог, уушийн газрууд болон хүнсний дэлгүүрүүд америк бараа бүтээгдэхүүнээс татгалзаж эхэлсэн байна. Тэр бүү хэл “Америк” гэсэн үг орсон хоол ундны нэрийг ч өөрчилж эхэлжээ. Монтреаль хотын нэгэн кафе гэхэд л цэсэн дээрх американо кофений нэрийг “Канадиано” болгон өөрчилсөн гэнэ.
Трамп түрүү долоо хоногт баталсан зарим тарифаа цуцалж, заримыг нь дөрөвдүгээр сарын 2-наас нааш хэрэгжүүлэхгүй гэсэн ч канадууд Трампын Засгийн газрыг хангалттай хохирол учруулсан гэж үзэж байна. Трамп Канадыг Америкийн 51 дэх муж болгоно, Хойд Америкт нэгдсэн нэг том улс байх нь хүн бүрд ашигтай гэхээс гадна Канадын Ерөнхий сайд Жастин Трюдог “амбан захирагч” хэмээсэн нь олны дургүйцлийг хүргэсэн юм.
Канадууд Jack Daniel’s тэргүүтэй америк брэндүүдээс татгалзахын хажуугаар Америкийн хэд хэдэн мужид нийлүүлдэг цахилгаан, эрчим хүчнийхээ үнийг 25 хувиар нэмэхээр төлөвлөж байгаа аж. Энэ нь 1.5 сая орчим америк өрхөд нөлөөлнө гэсэн тооцоо байна.
Өөр нэг сонирхолтой баримт дурдахад Трампыг өнгөрсөн арваннэгдүгээр сард Ерөнхийлөгчийн сонгуульд ялснаас хойш Америкаар аялах захиалга өгөх канад иргэдийн тоо өмнөх жилүүдийнх нь дундажтай харьцуулахад даруй 40 хувиар буурчээ. Өмнө нь канадуудын хувьд хамгийн олноороо зорчдог гадаад улс нь Америк байсан агаад зөвхөн 2024 онд гэхэд канад аялагчид Америкийн аялал жуулчлалын салбарт 20.5 тэрбум ам.долларын ашиг оруулсан байна.
Мэргэжилтнүүдийн анхааруулж байгаагаар тарифын өсөлтөөс үүдэлтэй энэ мэт зөрчил, санхүүгийн алдагдал нь Америк, Канадын аль алиных нь эдийн засагт халтай юм. Канадын экспортын барааны дийлэнхийг Америкийн компаниуд худалдаж авдаг тул Трампын тарифын бодлогоос болж америк, канад нийлсэн нийт сая гаруй хүн ажлын байраа алдах эрсдэл ч байгаа гэнэ. Ийм тодорхойгүй байдал нь хөрөнгө оруулалтыг ч царцаах магадлал өндөр юм.
.avif)
