Дональд Трампын эхлүүлсэн худалдааны дайны ээлжит хохирогч нь Европын архи, дарс үйлдвэрлэгчид болох нь. Европын холбоо ган, хөнгөн цагааны импортын тарифийг нэмэгдүүлсэн Трампын шийдвэрийн хариуд Америкийн вискинд 50 хувийн татвар ногдуулахаар төлөвлөж байгаагаа зарлажээ. Харин Трамп хариу цохилт болгож Европын орнуудаас нийлүүлэх бүхий л төрлийн согтууруулах ундаанд 200 хувийн тариф ногдуулна хэмээн сүрдүүллээ. Үүгээр үл барам тус холбоог “дайсагнасан, өдөөн хатгасан бодлоготой”, “Америкийг ашиглах, давхар хохирох ганц зорилгоор байгуулагдсан” гэх зэргээр бухимдлаа илэрхийлжээ. Европын хороо асуудлыг дипломат замаар шийдвэрлэх хүсэлтэй байгаагаа удаа дараа мэдэгдсэн ч талууд яриа хэлэлцээ хийх асуудлаар хараахан шийдэлд хүрээгүй байна.
Европын дарс үйлдвэрлэгчид Америк руу жилд дунджаар 4.5 тэрбум евро буюу 4.8 тэрбум ам.долларын бараа бүтээгдэхүүн нийлүүлдэг аж. Америк Европын согтууруулах ундаа үйлдвэрлэлийнхэнд хамгийн том зах зээл нь тул тарифийн дайн талуудын хэн хэнд нь ашиггүй гэдгийг ажиглагчид онцолсоор байна.
.avif)
