Бидний бүтээмж дэлхийн дунджаас 3.6 дахин бага байна

Гэр бүл, хөдөлмөр, нийгмийн хамгааллын яам, Азийн бүтээмжийн байгууллага, Монголын бүтээмжийн холбоо хамтран үндэсний бүтээмжийн үзэл баримтлалыг тодорхойлж, үндэсний хэмжээнд бүтээмжийн хөдөлгөөнийг эрчимжүүлэх зорилго бүхий “Бүтээмжийн хувьсал” чуулганыг өнөөдөр зохион байгууллаа. Гэр бүл, хөдөлмөр, нийгмийн хамгааллын сайд Л.Энх-Амгалан “Засгийн газраас ирэх дөрвөн жилд эдийн засгийн тогтвортой өсөлт бий болгох, нэг хүнд ногдох ДНБ-ийг 8000-10 000 ам.долларт хүргэх, ядуурлын хоёр дахин бууруулах томоохон зорилт тавьсан. Үүнийг хэрэгжүүлэхийн тулд бүтээмжийн талаар ярих ёстой. Өнөөдөр монгол хүн бүр өндөр цалин авахыг хүсэж байна” хэмээн энэ үеэр онцолсон. Хөдөлмөрийн бүтээмж, цалин хөлс шууд хамааралтай. Манай улсад уул уурхай, мэдээлэл технологи болон банк, санхүүгийн салбар хамгийн их бүтээмжтэй, цалин өндөр байгааг тэрбээр мэдээлэв. Энэ хэрээр эдгээр салбарт бүтээмж өндөр байна гэсэн үг.  

Гэсэн ч өнөөдрийн байдлаар Монгол Улсын хөдөлмөрийн дундаж бүтээмж дэлхийн дунджаас 3.6, БНСУ-ынхаас 5.4 дахин бага байна. Энэ онд хөдөлмөрийн хөлсний доод хэмжээ 660 мянган төгрөг байгаа бөгөөд сарын хөдөлмөрийн 192 цагт хуваан тооцвол монгол хүн хамгийн багадаа нэг цагт нэг ам.доллартай тэнцэх үнэлгээтэй ажил хийж буй хэрэг. Тиймээс бүтээмжийн хувьсгал өрнүүлж,төр, хувийн хэвшлийн бүх түвшинд бүтээмжийг нэмэгдүүлэх бодлого, зохицуулалт, арга хэмжээг төлөвлөж хэрэгжүүлэхээ сайд Л.Энх-Амгалан хэллээ. Мөн тэрбээр “Албан бус сектор буюу хөдөө аж ахуй, аялал жуулчлал, үйлдвэрлэл, үйлчилгээний салбарт бидний өрсөлдөх чадвар муу байна. Иймд өрсөлдөх чадвараа дээшлүүлэхийн тулд бүтээмжээ дээшлүүлэх ёстой. Бүтээмжийг дээшлүүлэхийн тулд инновацдаа анхаарах шаардлагатай. Жишээ нь, малчин хүн ч бүтээмжээ нэмэгдүүлж болно. 100 ямаанаас 300 ямаанаас гарахтай дүйцэх өндөр чанартай ноолуур гаргаж чадвал тухайн малчин инновац нэвтрүүлж чадсан байна гэсэн үг. Ингэснээр түүний орлого нэмэгдэнэ. Нэг талаас манайд 60-70 мянган ажилгүй иргэн байгаа ч нөгөө талд 30-40 мянган ажлын байр эзэнгүй байна. Цалин багатай салбарт ажиллах хүн олдохгүй байна. Иймд цалин багатай салбаруудынхаа бүтээмж, инновац, ур чадварыг дээшлүүлэх ёстой” хэмээн тайлбарласан юм.

Оюуны хөдөлмөрийг дэмжиж, цахим болон зайнаас ажиллах ажлын байрыг нэмэгдүүлж, монгол хүний хөдөлмөрийн бүтээмж, цалин хөлсийг жил бүр нэмэгдүүлэхээр төлөвлөж байна. Мөн хөдөлмөрийн аюулгүй байдлыг бүх түвшинд баримталсан зохистой ажлын байр бий болгож, бүтээмжийн экосистемийг бий болгохоор төлөвлөн ажиллана.

‍