Японы Засгийн газраас 2024 оны 6-р сарын 14-ний өдөр баталсан “Гадаадын ажиллах хүчнийг ажиллуулах бодлого”-ын хүрээнд “Ур чадварын дадлага” тогтолцоог шинэчлэн “Икүсэй шюүро буюу Суралцагч ажилтан” тогтолцоог / 育成就労 “Employment for Skill Development" (ESD)/ 2027 оны 7 дугаар сараас эхлэн шинээр нэвтрүүлэхээр шийдвэрлэсэн. Энэ тогтолцоо нь тодорхой хүний нөөцийн хомсдолтой салбарууд болох өндөр технологийн үйлдвэрлэл, үйлчилгээний салбар зэрэгт төвлөрч илүү тодорхой ур чадвар, туршлагатай хүмүүсийг бэлтгэх зорилготой юм.
Энэ нь өнөөг хүртэл хэрэгжиж ирсэн “Ур чадварын дадлагажигч” /技能実習生 "Technical intern trainee"/ “Тусгай ур чадвартай ажилтан” /特定技能 ”Skilled Worker” / гэсэн хоёр төрлийн гадаадаас ажиллах хүчин хүлээн авах тогтолцооны уялдааг нэмэгдүүлэх, дутагдалтай талыг сайжруулж боловсронгуй болгох зорилготой.
🔹“Икүсэй шюүро буюу Суралцагч ажилтан” шинэ тогтолцооны хүрээнд ажлын байранд япон хэлний түвшинг сайжруулж, зохих ур чадварыг хурдан хугацаанд эзэмшиж чадвал дадлагажигчийн гурван жилийн хугацаа дуусахыг хүлээлгүйгээр “Тусгай ур чадвартай ажилтан” болох шалгалт өгөх эрх нь үүснэ. Хүний эрхийг хамгаалах, ажлын байрыг солих зэргээр “Ур чадварын дадлага” тогтолцооны дадлагажигчаас илүү эрх эдлэх боломжтой болно.
🔹Япон Улс 1993 оноос гадаадын ажиллах хүчнийг авч ажиллуулахад гол үүрэг гүйцэтгэж ирсэн “Ур чадварын дадлага” тогтолцоо”-г “Икүсэй шюүро буюу Суралцагч ажилтан” тогтолцоонд 2030 он хүртэл үе шаттайгаар бүрэн шилжүүлэх аж.
🔹Шинэ болон хуучин тогтолцооны хүрээнд ажиллах хүчний шилжилт хөдөлгөөний асуудлаар Япон, Монгол талуудын хооронд харилцан санал солилцон ажиллаж байна. Ажиллах хүчний асуудлыг Монгол Улсын Гэр бүл, Хөдөлмөр нийгмийн хамгааллын яам, Хөдөлмөр, халамж үйлчилгээний ерөнхий газар, Япон Улсын Эрүүл мэнд, Хөдөлмөр халамжийн яам, “Ур чадварын дадлага” тогтолцоог хэрэгжүүлэгч байгууллага /OTIT/ болон Хилийн шалган нэвтрэх, оршин суух хяналтын байгууллага хариуцдаг.
.avif)
