Тус улсын Төрийн департмент ирэх хэдэн сард багтаан голдуу баруун Европт байрлах консулын газруудаа хааж, хилийн чанадад ажиллаж байгаа төрийн албан хаагчдынхаа тоог цөөлөхөөр төлөвлөж байгаагаа зарлалаа. Гэхдээ чухам аль аль улс дахь консулын газруудаа хаахаа одоогоор мэдэгдээгүй байна. Мөн Вашингтонд төвтэй хэд хэдэн газар, агентлаг, тусгай хороодыг нэгтгэж, тухайлбал хүний эрх, дүрвэгчид, эмэгтэйчүүдийн эрх, олон улсын гэмт хэргийн сүлжээ, хүний наймаа зэрэг асуудлыг эрхэлсэн зарим албадыг цөөлөн бүтцийн шинэчлэл хийх гэнэ. Энэ нь Дональд Трампын Засгийн газраас явуулж байгаа төрийн үргүй зардлыг бууруулж, ажилчдыг цомхотгон, төсөв хэмнэх гэсэн ажлынх нь нэг хэсэг аж. Трамп болон түүний тэрбумтан түнш Элон Маск нар Америкийн засаг захиргааны бүтцийг хэт данхгар, том байна, америкчууд ялангуяа хилийн чанадад асар их хөрөнгө мөнгө үрэн таран хийж байна гэж мэдэгдсээр байгаа юм.
Харин Европ дахь консулын газруудынхаа үүдийг барина гэсэн дээрх шийдвэр Орос-Украины дайны асуудлаас болж урьд байгаагүйгээр үл ойлголцолд ороод байгаа Америк-Европын харилцаа таагүй болж ирсэн үетэй давхцаж байгаагаараа олны анхаарлыг татаж байна.
Америкийн Төрийн департамент дэлхийн хэмжээнд нийт 70 мянга орчим ажилтан, албан хаагчтай өндөр дээд түвшний 270 гаруй дипломат төлөөлөгчийн газар ажиллуулдаг юм.
.avif)
