Талибаны дэглэмээс зугтаж, Оманд дээд боловсрол эзэмшихээр суралцаж байсан нийт 82 афган эмэгтэй Америкийн шинэ Засгийн газраас явуулж эхэлсэн гадаадын тусламж, үйлчилгээг танах бодлогоос болж нутаг буцахаас өөр аргагүй байдалд орсон байна. USAID буюу Америкийн Олон улсын хөгжлийн хөтөлбөрийн тэтгэлэг хүртсэн тэдгээр охид, эмэгтэйчүүд тэтгэлэг нь зогссон тул хоёр долоо хоногийн дотор Афганистан руу буцах хэрэгтэй гэсэн зааварчилгаа хүлээн авчээ. Одоогоос бараг дөрвөн жилийн өмнө Афганистаны төрийн эрхэнд эргэн гарсан талибууд эмэгтэйчүүдийн эрхийг бүхий л талаар боогдуулж, 2022 оны арванхоёрдугаар сараас эмэгтэй хүнийг их дээд сургуульд сурахыг хориглоод байгаа юм.
Дээрх эмэгтэйчүүдийн дийлэнх нь 20 гаруйхан настай бөгөөд 2021 онд талибуудыг засгийн эрхэнд гарахаас өмнө Америкийн тэтгэлэгт хөтөлбөрт тэнцжээ. Харин Талибаны шинэ хууль хэрэгжиж эхэлсний дараа Пакистан руу зугтаж, өнгөрсөн аравдугаар сард арай гэж Оманд хөл тавьсан аж. Албадан нутаг буцаагдвал дээрх эмэгтэйчүүд бүгд шийтгүүлж, ял эдлэхгүй юм гэхэд богтлогдож, хүчээр хүнтэй суух нь баттай гэнэ.
USAID-ийн тэтгэлэг уг нь 2028 он хүртэл хэрэгжих ёстой байж.
.avif)
