Үндэсний стандартын 44.8 хувь нь олон улсын түвшинд хүрсэн ч хэрэгжилт нь хангалтгүй байна

Шадар сайд С.Амарсайханы ажлын алба, УИХ-ын гишүүн, Стандартын хууль эрх зүйн орчныг сайжруулах ажлын хэсгийн дарга О.Батнайрамдал, Стандарт, хэмжил зүйн газар хамтран “Стандартчилал, техникийн зохицуулалт, тохирлын үнэлгээний итгэмжлэлийн тухай хууль”-ийн төслийг УИХ-д өргөн мэдүүлэхтэй холбоотойгоор "Стандартын хэрэгжилт ба эрх зүйн орчин” нэгдсэн хуралдааныг зохион байгууллаа. Шадар сайд С.Амарсайхан хуралдааныг нээж хэлсэн үгэндээ “Засгийн газрын 2024-2028 оны үйл ажиллагааны хөтөлбөрт “Нэг улс-Нэг стандарт” хөтөлбөр хэрэгжүүлэхээр тусгаж, нийт 33 салбарын үйл ажиллагаанд шинээр стандарт нэвтрүүлэн, бүсчилсэн хөгжлийн бодлоготой уялдуулахаар зорьж байна. Манай улсын хувьд өндөр стандарт мөрдөх нь зөвхөн хуульд нийцүүлэх үйлдэл бус, харин чанартай амьдралын хэв маяг бий болгох, бизнесийн орчинд итгэлцэл нэмэгдүүлэх, төрийн байгууллагуудын ил тод байдал, үр ашигтай үйл ажиллагааг дэмжихтэй шууд холбоотой. Стандартын гол ач холбогдол нь зөвхөн хууль, эрх зүйн хүрээнд биш, харин өдөр тутмын амьдралд хэрхэн хэвшүүлж байгаад оршино. Өөрөөр хэлбэл, стандарт нийгмийн сэтгэлгээнд гүн гүнзгий шингэж, амьдралын дадал, нийгмийн шаардлага, ажил үйлчилгээ харилцааны соёл болсон цагт улс зөв хөгжинө.  Бидний оршин буй нийгмийн соёл, аюулгүй байдал, та бидний ая тухтай, чанартай амьдралын үндэс суурь бол стандарт юм” гэдгийг онцоллоо.

2025 оны хоёрдугаар сарын байдлаар үндэсний стандартын 44.8 хувь нь олон улсын түвшинд хүрсэн хэдий ч хэрэгжилт асар хангалтгүй байгаа аж.

Тухайлбал, барилгын салбарт 655,  хүнсний салбарт 645, эрүүл мэндийн салбарт 744 стандарт мөрдөгдөж байгаа ч эдгээрийн дийлэнх нь шинэчлэгдэх шаардлагатай байна.

Иймд Стандартчилал, техникийн зохицуулалт, тохирлын үнэлгээний итгэмжлэлийн тухай хуулийг шинэчлэх төслийг УИХ-ын хаврын чуулганаар хэлэлцүүлэхээр ажиллаж байгааг Шадар сайд С.Амарсайхан тодотгосон. Хуулийн шинэчилсэн найруулгаар стандартын эрх зүйн орчин, салбар хоорондын хамтын уялдаа холбоо, хяналт, үнэлгээний системийг сайжруулах, олон нийтийн оролцоог нэмэгдүүлэх замаар хэрэгжилтийнх нь үр дүнг хэмжиж, аюулгүй байдал, чанар, итгэлцлийг дээшлүүлэхэд чиглүүлэх, уг салбарын мэргэжилтэн, боловсон хүчнийг бэлтгэх, үндэсний лабораториудын хөрөнгө оруулалтыг эрс нэмэгдүүлэх боломж бүрдэх юм.