2028 оны Ерөнхийлөгчийн сонгуульд өрсөлдөхөө албан ёсоор зарлахаар зэхэж байсан Истанбул хотын дарга Экрем Имамоглуг баривчилсантай холбоотойгоор Туркт сүүлийн 10 гаруй жил болоогүй, эрх баригчдыг эсэргүүцсэн иргэдийн томоохон жагсаал цуглаан тав дахь өдрөө үргэлжиллээ. Тус улсын одоогийн Ерөнхийлөгч Режеп Тайип Эрдоаны гол өрсөлдөгч гэгдэх болсон Имамоглуг албаныхан өнгөрсөн лхагва гарагт терроризм болоод авлигын хэргээр баривчилсан юм. Эрдоан түүний гишүүн нь болох, Туркийн гол сөрөг хүчин Ардын бүгд найрамдах намыг “ард олныг хагаралдуулж, энхтайвныг бусниулах гэлээ” хэмээн шүүмжилсэн байна.
Истанбул хотын захиргааны байрны гадаа цугласан хэдэн зуун хүний өөдөөс цагдаа нар нулимс асгаруулагч хэрэглэсэн бол Анкара, Измир зэрэг хотод жагсагчдын өөдөөс даралттай ус шүршчээ. Албаныхан ганц баасан гаргийн орой гэхэд 343 хүн баривчилсанаа мэдэгдээд байна. Харин Имамоглутай хамт улстөрч, сэтгүүлч, бизнесмэн нийлсэн өөр 100 гаруй хүнийг сөрөг хүчнийхэнтэй холбоотой, авлигын хэргээр шалгана гэх нэрийдлээр баривчлан саатуулаад байгаа гэнэ.
Эрдоан Ерөнхий сайд, Ерөнхийлөгчийн хувиар сүүлийн 22 жил Туркийг удирдаж байгаа юм. Хууль ёсоор ирэх 2028 оны Ерөнхийлөгчийн сонгуульд өрсөлдөх эрхгүй болсон түүнийг ажиглагчид Үндсэн хуульд нэмэлт өөрчлөлт оруулж магадгүй гэж таамаглаж байна.
.avif)
