АНУ-ын Ерөнхийлөгч Дональд Трамп улс орондоо зөвхөн эр, эм хоёр хүйсийг хүлээн зөвшөөрнө гэж мэдэгдсэнтэй холбоотойгоор Дани, Финландын эрх баригчид трансжендер иргэддээ онцын шаардлагагүй бол Америк руу зорчихгүй байхыг анхааруулж, албан ёсоор зөвлөмж гаргажээ. Эдгээр улс хүний эрхийг дээдэлдэгээрээ дэлхийд дээгүүрт ордог бөгөөд трансжендер хүмүүсийн бичиг баримт дээр хүйсийг нь Х үсгээр тэмдэглэн, эрхийг нь хууль ёсоор хамгаалдаг юм.
Гар утаснаас нь Трампыг шүүмжилсэн хэд хэдэн зурвас олдсон хэргээр франц эрдэмтнийг Америкийн хилээс албадан буцаасан, Нэгдсэн Улсад амьдран суух зөвшөөрөлтэй Германы нэг иргэнийг тодорхойгүй шалтгаанаар байцаан саатуулсан зэрэг мэдээллээс болж Европын олон улс мөн дээрхтэй төстэй зөвлөмж гаргаад байна.
Данийн Засгийн газар Америк руу зорчихоор төлөвлөж байгаа трансжендер иргэдээ замд гарахаасаа өмнө Копенхаген дахь Америкийн Элчин сайдын яамтай заавал холбогдохыг зөвлөсөн бол Финландын албаныхан Америк дахь өөрийн орны Элчин сайдын яамтай мөн давхар холбоотой байхыг иргэддээ сануулжээ.
Трампын засаг захиргаа трансжендер хүнийг Зэвсэгт хүчинд алба хаах, спортын тэмцээн уралдаанд оролцохыг хориглосны дээр 19-өөс доош насныхныг хүйс солиулах эмчилгээ, хагалгаанд орохыг хориглоод байгаа юм.
.avif)
