Хүний гавьяат эмч П.Батчулууныг суллах, уучлал үзүүлэхийг хүсэж түүний эрүүл мэндэд санаа зовниж буй талаараа салбарынхан нь дуу хоолойгоо нэгтгэсээр байна. Мөн нөгөө талд эрхтэн шилжүүлсэн донорын хохирогчийн гэр бүл олон нийтэд хандаад байгаа юм.
Тэгвэл өнөөдөр П.Батчулуун эмчийг хорих ангид байхдаа сүрьеэ өвчин туссан гэдгийг УИХ-ын гишүүн Ж.Чинбүрэн хэлсэн. Үүнтэй зэрэгцээд УИХ дахь Хүний эрхийн дэд хорооны дарга С.Эрдэнэболд мөн л "П.Батчулуун эмч хоригдож байх хугацаандаа нэмж халдвар авснаас үүдэн биеийн байдал нь маш хүнд байна. Амьд явах эрхийг нь хамгаалах нь чухал" гэсэн тайлбарыг өгөөд байгаа.
Гэтэл энэ мэдээллийн дараахан Шүүхийн шийдвэр гүйцэтгэх байгууллагаас мэдэгдэл гаргалаа. Тус байгууллага “П.Батчулуун эмч цагдан хорих 461-дүгээр ангид байхдаа сүрьеэ туссан, биеийн байдал хүнд стресс ихтэй байгаа” гэх мэдээллийг нийтэлсэн нь бодит бус, ташаа мэдээлэл болохыг албан ёсоор мэдэгдэж байна. Энэхүү мэдээлэл нь байгууллагын хэвийн үйл ажиллагаа, албаны нэр хүндэд сөргөөр нөлөөлөхийн зэрэгцээ хоригдогч тэдний ар гэрийнхэнд эргэлзээ төрүүлж, сэтгэл зүйн тогтворгүй байдлыг бий болгож байна. Хувийн мэдээлэлд нь хүндэтгэлтэй хандахыг хүсье” гэсэн юм.
Өөрөөр хэлбэл, ард түмнээс сонгогдож төр түшилцэх хариуцлагатай алба хашиж буй УИХ-ын гишүүдийн хэлсэн П.Батчулуун эмчийг сүрьеэгээр өвчилсөн гэдэг мэдээллийг төрийн агентлаг нь албан ёсоор үгүйсгэлээ.
Тэгвэл хоёрын төрийн түшээ хүн хүний эрүүл мэндийн буюу эмзэг мэдээллийг задлан барин эрүүл хүнийг сүрьеэтэй гэж яагаад хэлэв. Үнэхээр тийм бол төрийн агентлаг нь яагаад мэдэгдэл гаргаж үгүйсгэв.
Энэ мэтээр хоёр талын мэдээллийн дунд ард түмэн төөрөлдөж хэнд нь итгэхээ мэдэхээ болиод байна. Төрийн түшээд нь худлаа ярив уу төрийн агентлаг нь “арьсаа” хамгаалсан мэдэгдэл гаргав уу. Энэ бол хүний эрүүл мэнд, амь нас болоод эмзэг мэдээлэлтэй холбоотой учраас ингээд хоёр талд нүүрээ хамгаалаад хоёр өөр зүйл яриад суух нь зүйд нийцэмгүй.
.avif)
.avif)
