.jpg)
Манай Засгийн газар Бүгд найрамдах Энэтхэг Улсын “Экспорт-Импорт” банкнаас нэг тэрбум ам.долларын зээл авч, газрын тос боловсруулах үйлдвэр барих ажлыг 2016 онд эхлүүлсэн. Гэвч ийнхүү ажил эхэлсний дараа тус төслийн удирдлагын зөвлөх “Инженерс Индиа лимитед” компани ТЭЗҮ боловсруулж, газрын тос боловсруулах үйлдвэр барих нийт зардалд нэг тэрбум 236 сая ам.доллар шаардлагатай гэж дүгнэсэн юм. Улмаар УИХ уг нэмэлт санхүүжилтийн хэлэлцээрийг 2019 оны аравдугаар сард соёрхон баталсан билээ.
Тэгвэл энэ зардал дахин өсөж, нэмэлтээр 462.2 сая ам.доллар шаардлагатай болжээ. Өөрөөр хэлбэл, уг үйлдвэрийг нийт нэг тэрбум 698.2 сая ам.доллараар барих тооцоо хийж. Үндсэндээ 1.7 тэрбум ам.доллараар газрын тос боловсруулах үйлдвэр барихаар болж буй бөгөөд нэмэлт санхүүжилтийн зээлийн хэлэлцээрийн төслийг УИХ хэлэлцэж эхлэв.
Өнөөдөл эл төслийг Эдийн засгийн байнгын хороо үүнийг хэлэлцэн, дэмжсэн юм.
Зардал нэмэгдсэн шалтгаан нь сүүлийн жилүүдэд үүссэн эдийн засгийн хямрал, үнийн өсөлт, байгаль орчинд үзүүлэх сөрөг нөлөөллийг бууруулах, түгээх, тээвэрлэхтэй холбоотой дэд бүтцийн өөрчлөлтүүд, технологийн лиценз эзэмшигчээс тавьсан нэмэлт шаардлагуудтай холбоотойг “Монголын газрын тос боловсруулах үйлдвэр” ТӨХХК зэрэг эрх бүхий байгууллага, албан тушаалтнаас мэдэгдэж буй. Энэ удаагийн зээл нь 1.75 хувийн хүүтэй, үйлчилгээний болон хөрөнгө нөөцлөн баталгаажуулсан шимтгэл тус бүр 0.5 хувь, үндсэн төлбөрөөс чөлөөлөгдөх хугацаа нь тав, эргэн төлөгдөх нөхцөл нь 20 жил байх аж. Мөн манай тал зээлээ төлөөгүй тохиолдолд газрын тос боловсруулах үйлдвэрийн орлогоос татан авахаар тусгажээ.
Одоогоор газрын тос боловсруулах үйлдвэр барих төслийн нийт ажлын гүйцэтгэл 22.5 хувьтай, үүнээс технологийн бус барилга, байгууламжийг бүрэн ашиглалтад оруулж, Улсын комисст хүлээлгэн өгөхөөр ажиллаж байна.
Харин бусад ажлын гүйцэтгэл 8-27 хувийн гүйцэтгэлтэй байгаа бөгөөд 286.6 сая ам.долларыг зээлээсээ зарцуулаад буй аж.
Газрын тос боловсруулах үйлдвэрийг 2027 оны сүүлчээр ашиглалтад оруулахаар төлөвлөж байгаа юм.
.avif)
.avif)