1992 оноос хойш дэлхийн бүх хуванцар хаягдлын тэн хагасыг хүлээн авч боловсруулж байсан Хятад улс 2018 онд хог хаягдлын импортод хориг тавьснаар хог боловсруулах салбарын зах зээл тэр чигтээ өөрчлөгджээ. Харин эл өөрчлөлтийн нөлөөгөөр хөгжингүй орнуудын хог хаягдлыг сүүлийн хэдэн жилд хамгийн ихээр нь хүлээн авсан Тайланд улс одооноос хуванцар хаягдал гаднаас импортлохоо зогсоолоо. Тус улс 2018 оноос хойш АНУ, Их Британи, Япон зэрэг хөгжингүй орнуудаас нийт 1.1 сая тонн хуванцар хаягдал импортолсон бол зөвхөн 2023 онд ганц Японоос гэхэд л 50 сая кг хуванцар хог хаягдал хүлээж авчээ.
Тайландын парламент ердөө өнгөрсөн сард хог хаягдлын импортын тухай шинэ хууль баталж, ийнхүү хэрэгжүүлж эхэлсэн нь энэ гэнэ.
Байгаль хамгаалагчид болон олон улсын шинжээчдийн “хог хаягдлын колоничлол” хэмээн нэрийддэг эл үзэгдлийг тайландчууд хүчтэй эсэргүүцэж, ялангуяа 2019 онд Бангкок хотод болсон АСЕАН буюу Зүүн өмнөд Азийн бүс нутгийн хамтын ажиллагааны нийгэмлэгийн 34 дэх удаагийн дээд хэмжээний чуулганаар олон хоног дараалсан эсэргүүцлийн цуглаан зохион байгуулж, түүнээс хойш эрх баригчдад байнга шаардлага хүргүүлж ирсэн нь ийнхүү үр дүнгээ өгчээ.
Дотооддоо боловсруулж, устгалд оруулах нь ихээхэн өртөгтэй байдаг тул хөгжингүй орнууд Тайланд шиг ажиллах хүч нь хямд орнууд руу хог хаягдлаа экспортолж ирсэн байна. АНУ зэрэг томоохон орнуудад энэ нь дотоодын ч том зах зээл болдог. Жишээ нь Америкийн зүүн хойдын мужууд бүх төрлийн хог хаягдал, тэр бүү хэл муу усны хоолойноос тунасан ялгадас зэргээ өмнөдийн мужууд руугаа илгээж, булшилдаг гэсэн мэдээ бий.
Дэлхийн хуванцар хог хаягдлын менежментийн салбар 2023 онд 37 тэрбум ам.долларт эргэлдэж байсан бол 2027 он гэхэд 44 тэрбум ам.долларт хүрнэ гэж мэргэжилтнүүд тооцоолдог.
Тайланд улс ийнхүү хуванцар хог хаягдлын импортоо зогсоосноор Вьетнам, Малайз, Индонез зэрэг Зүүн өмнөд Азийн бусад орон хөгжингүй орнуудын хог хаягдлыг хүлээн авч боловсруулах гол улсууд болон үлдэж байна. Мөн Британийн хуванцар хог хаягдлын бараг 30 хувийг дангаараа боловсруулж, хариуд нь чамгүй ашиг хүртдэг гэх Турк улс жагсаалтын нэлээд дээгүүрт бичигдэж эхэлжээ.
.avif)
.avif)
