Шадар сайд С.Амарсайхан Бүгд Найрамдах Узбекистан Улсад энэ сарын 6-9-нд ажлын айлчлал хийхээр эх орноосоо мордлоо. Айлчлалын хүрээнд Худалдаа, эдийн засаг, шинжлэх ухаан, техникийн хамтын ажиллагааны Монгол, Узбекистаны Засгийн газар хоорондын комиссын анхдугаар хуралдаанд эх орноо төлөөлөн оролцох юм. Түүнчлэн Узбекистан улсын “Технопарк” ХХК, “Артель” үйлдвэр, Самарканд мужийн аж үйлдвэрийн цогцолборын үйл ажиллагаатай танилцаж, туршлага солилцоно.
Айлчлалын бүрэлдэхүүнд Монгол Улсаас тус улсад суугаа Онц бөгөөд Бүрэн эрхт Элчин сайд Д.Батбаатар, УИХ-ын Байгаль орчин, хүнс, хөдөө аж ахуйн байнгын хорооны дарга Б.Бейсен, Эдийн засгийн байнгын хорооны дарга Р.Сэддорж, МҮХАҮТ-ын ерөнхийлөгч Р.Төр-Од, Гадаад харилцааны болон Эдийн засаг хөгжлийн яам, бизнес эрхлэгчдийн төлөөлөл багтжээ. Энэ удаагийн айлчлал нь Монгол, Узбекистаны бизнес эрхлэгчдийн хамтын ажиллагааг өргөжүүлэх, шинэ боломжуудыг нээх зорилготой юм байна.
.avif)
.avif)
