Гэр бүлийн зургаан хүн угаартаж нас барсан хэрэг, хэргийн мэдээлэлтэй холбоотойгоор ХЗДХ-ийн сайд О.Алтангэрэл мэдээлэл хийлээ. Тэрбээр “Эрдэнэт хүний амь нас хохирсонд ар гэр төрөл төрөгсдөд нь эмгэнэл илэрхийлье. Байлдагч О.Одбаяр албаа үлгэр жишээ хариуцлагатай хаасан. Энэ асуудалд онцгойлон анхаарч ажиллаж байна. Цагдаа, АТГ мөрдөн шалгах ажиллагаа явуулж байна.
Тавантолгой түлш компанийн үе үеийн удирдлагуудыг мөрдөн шалгаж байгаа. 29 нэр төрлийн химийн бодист шинжилгээ хийж байна. Буруутай албан тушаалтнуудад түлшний барьцалдуулагчтай холбоотойгоор хариуцлага тооцно.
Хохирогчийн хувийн эмзэг мэдээллийг агуулсан мэдээлэл цахим орчинд пүрэв гарагийн орой 21:00 цагийн үед анх цацагдсан. Энэ бол Хувийн мэдээлэл хамгаалах хуулийг ноцтой зөрчсөн, эрүүгийн хариуцлага хүлээлгэх гэмт хэрэг. Хувь хүний нууцад халдсан, задруулсан нь тав хүртэлх жилийн хорих ялтай. Хүнд бэрхийг туулж яваа энэ үед албаны журмаар цацсан бол хариуцлага тооцно. Тиймээс шуурхай шалгах ажлын хэсгийг өчигдөр орой байгуулсан. Энэ мэдээлэлд дурдсан зарим зүйл цагдаагийн байгууллагад огт байхгүй, үнэнтэй нийцэхгүй ташаа мэдээлэл байна. Бид хамаг чадахаар хичээж буруутай этгээдийг олно. Цаашид хохирогчийн эрхийг зөрчсөн үйлдэл хийхгүй байхад онцгой анхаарна” гэлээ.
.avif)
.avif)
