Нэг гэр бүлийн зургаан хүн угаартаж насан барсан талаар ар гэр нь, цэрэгт татагдаад үлдэж хоцорсон ганц хүү нь олон нийтэд хандаад байна. О.Одбаяр “Би гэртээ өнгөрсөн сарын 26-нд чөлөөгөөр иртэл надад "Миний дүү тайван байгаарай гээд гэртээ орсны дараа ээж, дүү нар маань, ах өнгөрсөн гэж хэлсэн. Манайх байнга сайжруулсан түлш түлдэг. Надад маш их харамсалтай байна.Миний амьдрал бүрхэг болчихлоо. Дүү нар маань юу ч мэдэхгүй хүүхдүүд шүү дээ. Манай ах эгчээс цагдаа нар олон цагаар мэдүүлэг аваад, хэвлэлийнхэнд юу ч хэлж болохгүй гээд гарын үсэг зуруулсан байна лээ. Би одоогоор тийм бичиг баримтад гарын үсэг зураагүй. Би гэрийнхнийхээ төлөө чадах бүхнээ хийнэ. Хуульчдаас тусламж авахад нээлттэй, бэлэн байна. Би яахаа мэдэхгүй байна. Шүүх шинжилгээний задлангийн хариу гараагүй, сарын дараа гарна гэсэн. Би маш их гомдолтой байна. Манай том ахын охин, нөхөр нь намайг ярилцлага өгүүлэхгүй байсан. Та нар дөнгөж сая харлаа. Уг нь манайд мэдрэгч байсан. Тухайн үед мэдрэгч ажилласан, эсэхийг би мэдэхгүй байна. Улсаас оршуулгын зардлын нэг удаагийн буцалтгүй тусламжид 5 сая төгрөг өгсөн" хэмээн ярив.
Ийн хүүг нийтэд мэдээлэл өгөхийг хориглосон, хариуцлага хүлээлгэнэ гэсэн нь камерны өмнө түүнийг хорьж, гулдчилж байснаас харагдаж буйг олон нийт шүүмжилж буй. Гэвч цагдаа, хил хамгаалах байгууллагаас даруй мэдээлэл хийж өөрсдийгөө буруугүй, мэдээлэл өгүүлэхгүй гэж хэлээгүй хэмээж, улмаар хэдхэн цагийн дараа хохирогчдын маш эмзэг мэдээллийг нийгмийн сүлжээнд задаллаа. Ингэхдээ хэргийн газрын үзлэгийн мэдээллийг сошиал сүлжээнд "шидэж", хохирогчдыг архичин, хүүг нь хулгайч байсан хэмээн насанд хүрээгүй хүүхдүүдийнх нь зураг хөрөгтэй дэлгэв. Өөрөөр хэлбэл, мөрдөгчийн ширээн дээр байх учиртай хэргийн материал яагаад цахимд “тэнэж” яваагийн учрыг олох ёстой болж байна. Хуулиараа ч тийм.
Хувь хүний нууцад халдах, түүнийг харилцаа холбоо, цахим хэрэгсэл ашиглан тараах, мөрдөн байцаалтын нууц задруулах, цахим хэрэгсэл ашиглан тараах нь торгох, нийтэд тустай ажил хийлгэх, нийтийн албанд ажиллах эрхийг хасах, тав хүртэлх жилийн ялтай.
Эрүүгийн хууль
13.10 дугаар зүйл.Хувь хүний нууцад халдах
1.Хувь хүний хуулиар хамгаалагдсан нууцыг хууль бусаар олж авсан, бусдад дамжуулсан бол дөрвөн зуун тавин нэгжээс таван мянга дөрвөн зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас нэг жил хүртэл хугацаагаар зорчих эрхийг хязгаарлах ял шийтгэнэ.
2.Энэ гэмт хэргийг:
2.1.харилцаа холбоо, цахим хэрэгсэл ашиглаж;
2.2.эрх бүхий албан тушаалтан хуульд заасан үндэслэл, журмыг зөрчиж үйлдсэн бол таван мянга дөрвөн зуун нэгжээс хорин долоон мянган нэгжтэй тэнцэх хэмжээний төгрөгөөр торгох, эсхүл нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.
13.11 дүгээр зүйл.Хувь хүний нууцыг задруулах
1.Хувь хүний хуулиар хамгаалагдсан нууцыг олж мэдсэн хүн өөрийнх нь зөвшөөрөлгүйгээр задруулсан бол нэг мянга гурван зуун тавин нэгжээс арван мянган нэгжтэй тэнцэх хэмжээний төгрөгөөр торгох, эсхүл зургаан сараас хоёр жил хүртэл хугацаагаар зорчих эрхийг хязгаарлах, эсхүл зургаан сараас хоёр жил хүртэл хугацаагаар хорих ял шийтгэнэ.
2.Энэ гэмт хэргийг:
2.1.харилцаа холбоо, цахим сүлжээ ашиглаж;
2.2.албан үүргээ гүйцэтгэх явцад олж мэдсэн хувь хүний нууцыг задруулсан бол таван мянга дөрвөн зуун нэгжээс хорин долоон мянган нэгжтэй тэнцэх хэмжээний төгрөгөөр торгох, эсхүл нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.
21.9 дүгээр зүйл.Мөрдөн шалгах ажиллагааны нууцыг задруулах
1.Мөрдөн шалгах ажиллагааны талаарх баримт, мэдээллийг олж мэдсэн хүн мөрдөн шалгах ажиллагааны талаарх баримт, мэдээллийг задруулсан бол дөрвөн зуун тавин нэгжээс таван мянга дөрвөн зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас нэг жил хүртэл хугацаагаар зорчих эрхийг хязгаарлах ял шийтгэнэ.
2.Мөрдөн шалгах ажиллагааны талаар албаны үүргийн дагуу олж мэдсэн алба хаагч, ажилтан прокурорын зөвшөөрөлгүйгээр мөрдөн шалгах ажиллагааны талаарх баримт, мэдээллийг задруулсан бол нийтийн албанд ажиллах эрхийг нэг жилээс гурван жил хүртэл хугацаагаар хасаж хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл зургаан сараас гурван жил хүртэл хугацаагаар зорчих эрхийг хязгаарлах, эсхүл зургаан сараас гурван жил хүртэл хугацаагаар хорих ял шийтгэнэ.
3.Шүүгч, прокурор, хууль сахиулагч, өмгөөлөгч, мөрдөн шалгах ажиллагааны нууцыг албаны үүргийн дагуу олж мэдсэн алба хаагч, ажилтан мөрдөн шалгах ажиллагааны нууцалсан баримт, мэдээллийг зориуд задруулж, нууцалсан гэрчийг илчилж хэрэг шалган шийдвэрлэх ажиллагаанд саад учруулсан бол нийтийн албанд ажиллах эрхийг гурван жилээс таван жил хүртэл хугацаагаар хасаж нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.
.avif)
.avif)
