Хөрөнгө, орлогын мэдүүлгийг шинэчлэн гаргуулж дуусав

Авлигатай тэмцэх газраас Авлигын эсрэг хуулийн үйлчлэлд хамаарах албан тушаалтнуудын 2024 оны хувийн ашиг сонирхлын болон хөрөнгө, орлогын мэдүүлгийг жил бүрийн хоёрдугаар сарын 15-ны дотор шинэчлэн гаргуулдаг. Үүний дагуу ирүүлсэн мэдүүлгийн бүрдүүлэлтийн дүнг АТГ нэгтгэжээ.  Төрийн болон төрийн өмчит хуулийн этгээд 130 байгууллагын 48 841 мэдүүлэг гаргагч 2024 оны ХАСХОМ мэдүүлэхээр Авлигатай тэмцэх газарт нэрсийн жагсаалт ирүүлсэн байна. Энэ сарын 15-ны өдрийн 00:00 цагийн байдлаар 48 841 албан тушаалтан (үүнд цахимаар 45 630, цаасаар 3211) мэдүүлж, нийтийн албан тушаалтнууд ХАСХОМ-ээ хуулийн хугацаанд 100 хувь шинэчлэн гаргаж, баталгаажуулжээ. 2024 оны ХАСХОМ шинэчлэн гаргах нийт мэдүүлэг гаргагчдын тоо өмнөх оноос 1417-гоор цөөрсөн байна.

Улмаар Авлигын эсрэг хуулийн дагуу дараах албан тушаалтнуудын хөрөнгө, орлогын мэдүүлгийг тухайн оны хоёрдугаар улиралд багтаан цахим мэдээллийн сүлжээнд байрлуулах ёстой. Үүнд:

1. Монгол Улсын Ерөнхийлөгч;

2. УИХ-ын дарга, дэд дарга, гишүүн;

3.Ерөнхий сайд, Засгийн газрын гишүүн, Монгол Улсын сайд, дэд сайд;

4. Үндсэн хуулийн цэцийн дарга, түүний орлогч, гишүүн;

5. Улсын дээд шүүхийн ерөнхий шүүгч, шүүгч, Шүүхийн ерөнхий зөвлөлийн гүйцэтгэх нарийн бичгийн дарга;

6. Улсын ерөнхий прокурор, түүний орлогч;

7. Монгол банкны ерөнхийлөгч, тэргүүн дэд, дэд ерөнхийлөгч;

8. Үндэсний аюулгүй байдлын зөвлөлийн нарийн бичгийн дарга;

9. Засгийн газрын хэрэг эрхлэх газрын дарга;

10. Ерөнхийлөгчийн Тамгын газрын дарга;

11. УИХ-ын Тамгын газрын ерөнхий нарийн бичгийн дарга;

12. Авлигатай тэмцэх газрын дарга, дэд дарга;

13. Санхүүгийн зохицуулах хорооны дарга, гишүүн, Хяналтын зөвлөлийн дарга, гишүүн;

14. Үндэсний статистикийн газрын дарга, дэд дарга;

15. Хүний эрхийн үндэсний комиссын дарга, гишүүн;

16. Сонгуулийн ерөнхий хорооны дарга, нарийн бичгийн дарга;

17. Төрийн албаны зөвлөлийн дарга, гишүүн;

18. Ерөнхий аудитор, түүний орлогч;

19. Засгийн газрын агентлагийн дарга;

20. аймаг, нийслэлийн ИТХ-ын дарга;

21. аймаг, нийслэлийн Засаг дарга;

22. Монгол Улсын Ерөнхийлөгчийн болон УИХ-ын гишүүнд нэр дэвшигч багтана.