Цагаан сараар амрах өдрийг нэмээгүй, нэмэхгүй. Шинийн 4 буюу гуравдугаар сарын 3-ны даваа гаргаас төрийн байгууллагуудын ажил, үйлчилгээ хэвийн үргэлжилнэ. Хувийн хэвшлийнхэн Цагаан сараар хэрхэн ажиллаж, амрахаа өөрсдийн дотоод дүрэм, журмаараа зохицуулна.
Цагаан сарын шинийн 1, 2, 3-нд бүх нийтээр амрахаар Нийтээр тэмдэглэх баярын болон тэмдэглэлт өдрүүдийн тухай хуульд заасан. Энэ жилийн тухайд шинийн нэгэнгүй буюу гуравдугаар сарын 1 (шинийн 2)-нээс золгож, шинэлэхээр буй. Өөрөөр хэлбэл, гуравдугаар сарын 1, 2 буюу шинийн 2, 3-ны өдөр амралтын бямба, ням гарагт тохиож байгаа тул иргэдийн зарим нь эргэлзэх болсон. Олон нийтийг төөрөгдүүлж мэдэх үйл явдал ч өрнөж байна.
Тухайлбал, Цагаан сарын баярын амралтыг нэмэх цахим өргөдөлд иргэдээс гарын үсэг цуглуулж эхэлжээ. Ингэхдээ зарим баярын амралтын өдрийг хасах агуулгыг тусгаж, УИХ-д илгээх өргөдлийн petition.parliament.mn цахим хуудсанд байршуулж, олон нийтийн саналыг авч байна.
Эл өргөдлийг иргэн С.Чулуунпүрэв санаачилсан бөгөөд Цагаан сараар битүүний өдрөөс эхлэн 6-10 хоног амрах, цаашлаад наадам, Тусгаар тогтнолын өдөр, шинэ жилийн баяраар л нийтээрээ олон хоног амрах нь зүйтэй гэж үзэж буйгаа илэрхийлжээ. Мөн иргэн Д.Алтанхуяг Сар шинийн баяр болон үндэсний их баяр наадмын үеэр амрах өдрийг ажлын таван өдрөөс доошгүй болгох, нийтээр тэмдэглэх баярын болон тэмдэглэлт өдрүүд амралтын өдөр давхацсан тохиолдолд дараагийн ажлын өдөр нөхөж амардаг болгох нэмэлт, өөрчлөлтийг дээрх хуульд оруулах нь зүйтэй гэж үзэж цахим өргөдөлд гарын үсэг цуглуулж байна. Эдгээрийн аль алийг нь тус бүр 100 мянган хүн дэмжиж, гарын үсгээ зурвал УИХ хэлэлцэх юм.
Гэхдээ 100 мянган хүн дэмжлээ ч шинэлж, золгоход 10 хүрэхгүй хоног үлдээд буй энэ үед УИХ ээлжит бус чуулган зарлаж эл асуудлыг хэлэлцэх нь юу л бол.
Учир нь УИХ-ын тухай хуулийн дагуу ээлжит бус чуулганыг нийт гишүүний гуравны нэгээс доошгүй буюу наанадаж 42 гишүүн шаардсанаар, эсвэл Ерөнхийлөгч, УИХ-ын даргын санаачилгаар хуралдуулж болно. Иймд айсуй Цагаан сарын амралтыг сунгахын төлөө ийм чуулган зарлахгүй л болов уу. Харин цаашдаа дээрх өргөдөлд дурдсанчлан Цагаан сар гэлтгүй үндэсний томоохон баяраар олон хоног амарч, нийтээр тэмдэглэх баяр хэмээн хуульчилсан заримыг нь амралтгүй болгох зохицуулалтыг УИХ ирэх хаврын ээлжит чуулган, ер нь энэ бүрэн эрхийн хугацаандаа баталж, хуульчлахыг үгүйсгэхгүй. Гэр бүл, хөдөлмөр, нийгмийн хамгааллын яамны зүгээс ч нийтээр тэмдэглэх баярын өдрүүд цаашид долоо хоногийн амралтын өдрүүдэд таарсан тохиолдолд ажлын өдөрт шилжүүлэх, нөхөн амраах зохицуулалтыг холбогдох хуульд оруулах төслийг нь боловсруулж, УИХ-ыг ирэх хаврын чуулганаар өргөн барихаар төлөвлөж байгаагаа мэдээлэв.
Дахин хэлье, энэ жилийн Цагаан сараар амрах өдрийг нэмээгүй, нэмэхгүй. Шинийн 4 буюу гуравдугаар сарын 3-ны даваа гаргаас ажил, сургуульдаа бүгдээрээ явна.
.avif)
.avif)
