Нэгдсэн Улсын Засгийн газрын хэд хэдэн өндөр дээд албан тушаалтан, түүний дотор Дэд ерөнхийлөгч Ж.Д.Вэнс, Батлан хамгаалахын сайд Пит Хегсет, Төрийн нарийн бичгийн дарга Марко Рубио нар Америкийн Зэвсэгт хүчнээс Иемений нутагт саяхан явуулсан агаарын халдлагын талаар зөвшилцөх групп чаатандаа “The Atlantic” сэтгүүлийн сэтгүүлчийг санамсаргүй нэмж, төрийн нууц мэдээллийг сэтгүүлчдэд задруулсан нь ил болжээ. Цагаан ордны албаныхан “Signal” нэртэй аппликэйшн дээрх нууц групптээ сэтгүүлч нэмсэнээ, дайны нууц мэдээлэл алдсанаа огт мэдээгүй гэнэ. Харин ийм явдал болсныг мөнөөхөн сэтгүүлч, “The Atlantic”-ийн редактор Жеффри Голдберг өчигдөрхөн өөрөө мэдээлсэн байна. Тэрээр “Houthi PC Small Group” нэртэй групп чаатанд нэмэгдсэнээ мэдээд 18 гишүүнийг нь хартал бүгд Засгийн газрын өндөр дээд албаны улс байж. Гэхдээ тэрээр Иемений хутини босогчдын чухам аль түшиц газрыг устгах, нарийн байрлалыг тогтоох зэрэгтэй холбоотой мэдээллүүдийг харалгүй устгасан, сайн дураараа группээс гарснаа хүлээсэн байна. Гэсэн ч албаныхны өөр хоорондоо бичилцсэн зарим нэг зурвасыг олон нийтэд ил болгожээ.
Ийм явдал болсныг Америкийн Үндэсний аюулгүйн зөвлөлөөс хүлээн зөвшөөрч, зохих арга хэмжээг авна гэлээ.
.avif)
