Дональд Трампын хэрэгжүүлж эхэлсэн цагаачлалын хатуу бодлого, худалдааны дайн гэгдээд байгаа тарифийн шинэ хууль зэргээс болж Америкийг зорих гадаадынхны тоо өдрөөс өдөрт буурах болжээ.
Оксфордын Эдийн засгийн сургуулийн харьяа “Tourism Economics” судалгааны сэтгүүлд бичсэнээр Америкт хөл тавих аялагч, жуулчдын тоо энэ онд өмнөх оныхоос 5.1 хувиар буурах төлөвтэй байсан бол сүүлийн хэдэн сарын үйл явдлуудын дараах тандалтаар энэ тоо бүр 10 хувь давж ч магадгүй байна.
Трампыг Ерөнхийлөгчөөр сонгогдохын өмнөх урьдчилсан тооцоогоор Америкийн аялал жуулчлалын салбар 2025 онд өнгөрсөн оныхоос 8.8 хувиар өснө гэсэн таамаг байсан юм. Харин сүүлийн тооцоо, судалгааг харахад Америкийн аялал жуулчлалын салбар Ерөнхийлөгчийнхөө бодлогоос болж 64 тэрбум ам.доллар хүртэлх хэмжээний ашиг орлогын алдагдал хүлээх эрсдэл өндөр байна.
Дэлхийн аялал жуулчлалын форум хүрээлэн мөн Америкийн шинэ гадаад бодлого олон улсын дипломат, найрсаг харилцааг илэрхий таагүй, дайсагнасан, болгоомжилсон уур амьсгалд хүргэж байна хэмээн онцолжээ. Тус байгууллагаас өнгөрсөн арванхоёр, нэгдүгээр сард хийсэн хоёр ч судалгаанд хамрагдсан Ази, Европын нийт 16 орны иргэдийн 35 хувь нь Трампыг Ерөнхийлөгч байгаа цагт Америкт очих сонирхолгүй байна гэж хариулсан аж.
.avif)
