Олон улсын олимпын хорооны анхны ази дарга болохоор нэрээ дэвшүүлэн өрсөлдөж байгаа Олон улсын гимнастикийн холбооны ерөнхийлөгч, Японы Моринари Ватанабэ цаашид олимпын наадмыг, тэр дундаа өртөг зардал ихтэй зуны олимпын наадмыг таван тивийн таван хотод нэгэн зэрэг зохион байгуулах санал дэвшүүлээд байна. Түүнийхээр энэ нь ганц улсад санхүү, эдийн засгийн дарамт учруулахаас сэргийлсэн шинэлэг аргаас гадна дэлхийн өнцөг булан бүрд буй спортын хорхойтнуудыг нэгэн зэрэг олимпизмд “уруу татах” боломж гэнэ.
Олон улсын гимнастикийн холбоог 2017 оноос хойш даргалж байгаа Ватанабэ нь ирэх гуравдугаар сард суудлаа өгөх Олон улсын олимпын хорооны дарга Томас Бахын орыг авахаар нэрээ дэвшүүлсэн долоон хүний нэг юм.
Түүнээс гадна Британи, Франц, Зимбабве, Иордан, Швед, Испаниас Олон улсын олимпын хорооны даргын суудлын төлөө нэр дэвшигчид өрсөлдөж байгаа аж.
Ватанабэгийн онцолсноор нэг улс, нэг хот олимпын бүхий л тоглолтыг дангаараа зохион байгуулах нь орчин цагийн техник технологийн хөгжил газар сайгүй нэвтэрсэн өнөө үед “үеэ өнгөрөөсөн хэлбэр” юм. Тиймээс таван тавийн таван өөр хотод тус бүр нь спортын 10 төрлийн тоглолт, тэмцээнүүдийг зохион байгуулж, тэр болгоныг 24 цагаар шууд нэвтрүүлэх багц суваг ажиллуулах нь зүйтэй гэж үзжээ.
.avif)
.avif)