Канадын Ерөнхий сайд Жастин Трюдо бараг бүтэн 10 жил засгийн эрх барьсны эцэст Засгийн газрын тэргүүн бөгөөд эрх баригч Либерал намын даргын суудлаасаа бууж, намынхан нь шинэ тэргүүнээ тодруулсны дараа албан тушаалаа хүлээлгэж өгөхөөр шийдсэнээ мэдэгдлээ. Либерал намынхан сонгогчдын дунд нэр нөлөөгөө алдаж эхэлсэн, гол сөрөг хүчин Консерватив нам илүү нэр хүндтэй болж ирсэн үед ийм шийдвэр гаргасан нь ажиглагчдын анхаарлыг татаж байна. Трюдо мөн гуравдугаар сарын 24 хүртэл парламентын үйл ажиллагааг зогсоож буйгаа мэдэгджээ.
Харин Канадын эсрэг худалдааны тариф нэмэгдүүлэхээ удаа дараа илэрхийлээд байгаа Дональд Трамп Трюдогийн мэдэгдлийн дараахан “Канадад Америкийн 51 дэх муж болох хүсэлтэй хүн олон байгаа. Тэгвэл хэн хэн нь худалдааны алдагдал хүлээхгүй. Жастин Трюдо үүнийг сайн мэдэж байгаа болохоор огцорлоо” гэж сошиал медиадаа бичсэн байна. Тэрээр хэд хоногийн өмнө Трюдог Канадын “амбан захирагч” гэсэн нь олны анхаарлыг татсан юм.
Энэ жил 53 настай Трюдо 2013 оноос Либерал намыг тэргүүлж буй бөгөөд 2015 оны арваннэгдүгээр сард Ерөнхий сайд болсон юм. Харин Либерал намыг дэмжигчдийн хувь үзүүлэлт 16 хувьтай байгаа нь сүүлийн 100 гаруй жилийн түүхэнд байгаагүй, эрх баригч намын хамгийн муу үзүүлэлт гэгдэж байна. Канадын парламентын ээлжит сонгууль энэ оны аравдугаар сард болох юм.
.avif)
