Газын зурвасын хойд хагаст явуулж эхэлсэн Израилийн агаарын халдлагаас болж өдөр бүр 100 гаруй палестин хүүхэд амиа алдах юм уу, хүнд шархдаж байна гэж НҮБ-аас мэдээллээ. Израиль, “Хамас”-ын хооронд гал зогсоох гэрээ батлагдаад байсан ч барьцааны хүмүүсийг суллах амлалтаа гүйцэд биелүүлээгүй шалтгаанаар Израилийн талаас “Хамас”-т шахалт үзүүлж, өнгөрсөн гуравдугаар сарын 18-наас ахин агаарын цохилт хийж эхэлсэн билээ.
Палестиний Дүрвэгсдэд туслах НҮБ-ын тусгай агентлагийн тэргүүн Филипп Лаззаринийн хэлснээр хэдийгээр аливаа зөрчил мөргөлдөөний үеэр нөхцөл байдал адармаатай, аюултай байдаг ч хүүхэд эрсдэж, амь үрэгдэж буй ямар ч үйлдэлд зөвтгөл байх ёсгүй юм. Тус байгууллагын тооцоогоор Израиль, “Хамас”-ын дайн эхэлсэн 2023 оны аравдугаар сараас хойш Газын зурваст 15 мянга гаруй хүүхэд амь үрэгдээд байна.
Харин Лаззаринийн мэдэгдэлтэй бараг зэрэгцэх шахам Израилийн албаныхан Газын зурвасыг “Хамас” хариуцахаа больж, исламын хэт үзэлтнүүд барьцаанд байгаа израиль иргэдийг сулласан даруйд дайныг 24 цагийн дотор дуусгахад бэлэн байна хэмээн мэдэгдлээ. Газын зурваст одоо “Хамас”-ын барьцаанд 59 хүн үлдсэн гэсэн мэдээ байгаа юм.
.avif)
