Украины Ерөнхийлөгч улс орноо НАТО-гийн гишүүн болгож, ард түмэндээ энхтайвныг авчрахын тулд төрийн тэргүүний суудлаасаа буухад бэлэн байна гэлээ. АНУ-ын Ерөнхийлөгч Дональд Трамп түүнийг өнгөрсөн долоо хоногт сонгууль явуулахаас татгалзсаар байгаа, дарангуйлагч хэмээн цоллосон юм. Украин улс Оросын халдлага эхэлсэн 2022 оны хоёрдугаар сарын 24-ний өдрөөс хойш цэргийн онц байдалд байгаа бөгөөд Үндсэн хуулиараа онц байдлын үеэр сонгууль явуулахыг хориглодог байна. Володимир Зеленський 2019 оны тавдугаар сард ардчилсан сонгуулиар ялалт байгуулсан юм. Ерөнхийлөгчийн ээлжит сонгууль 2024 оны хавар явагдах байжээ.
Зеленський өнөөдөр Киев хотноо Европын хэд хэдэн орны албаныхантай уулзах бөгөөд Трампын бодлогоор Вашингтоны Орос, Украинд хандах байр суурь өөрчлөгдсөн тул дайны дараах Украины аюулгүй байдлыг бататгах нь одоо түүний гол зорилго болоод байна.
Цагаан ордон өдийг хүртэл нийлүүлсэн зэр зэвсэг, цэрэг армийн тусламжийнхаа хариуд хэдэн тэрбумаар үнэлэгдэх Украины ашигт малтмал, ховор металлыг авахыг хүсэж байгаа юм. Харин Зеленський Трампын Засгийн газартай энэ тал дээр зөвшилцөлд хүрч чадахгүй байгаагийн дээр Америкийн өмнөх Засгийн газар тусламж туслалцаагаа буцалтгүй тусламж гэж онцолсноос зээл гэж нэрийдээгүй гэж маргаж байгаа аж.
Тиймээс “хэдэн үеэрээ төлж барахгүй өрийн хэлэлцээ” хийхгүй гэж Зеленський мэдэгдсэн байна. Харин дайны галыг зогсоох тухайд Вашингтоны албаныхан эхлээд Путинтэй яг таг тохиролцох хэрэгтэй, тэгсэн цагт хэлэлцээрийн ширээний ард суухад бэлэн гэжээ.
Оросын арми Украины нутаг руу халдан түрэмгийлсний гурван жилийн ой өнөөдөр тохиож байгаа юм. Францын Ерөнхийлөгч Эмманюэль Макрон өнөөдөр, харин Их Британийн Ерөнхий сайд Сэр Кир Стармер пүрэв гарагт Вашингтон хотноо айлчлах мэдээ байна. Тэдний айлчлалын гол зорилго нь Орос-Украины дайныг эцэслэх яриа хэлэлцээрт Европын орнуудыг илүү оролцоотой байлгах асуудал байх болно гэж ажиглагчид онцолжээ.
.avif)
