Юн Сок Ёль бүрэн эрхийн хугацаа нь дуусаагүй байхдаа хууль хяналтынханд баривчлагдан шалгагдах Өмнөд Солонгосын түүхэн дэх анхны төрийн тэргүүн боллоо. Түүнийг өнгөрсөн арванхоёрдугаар сарын 3-ны өдөр цэргийн онц байдал тогтоохыг завдсан, төрийн эргэлт хийхийг оролдсон хэргээр баривчлаад байна.
Парламентаас импичментэд өртөж, албан тушаалаасаа буугаад байгаа түүнийг албан ёсоор огцруулаагүй бөгөөд Өмнөд Солонгосын Үндсэн хуулийн цэц парламентын импичмент баталсан журмыг ахин хэлэлцэж байж Ерөнхийлөгчийг огцруулах эсэх эцсийн шийдвэрийг гаргах юм.
Хууль хяналтынхан Юн Сок Ёлийн хамгаалалтын албаны бүслэлтийг сэтэлж, Ерөнхийлөгчийн өргөөний гадуур татсан төмөр торыг тасдаж байж дотогш нэвтрэн түүнийг баривчилсан байна. Өмнөд Солонгосын Авлигатай тэмцэх газар Ерөнхийлөгчийг баривчлах шүүхийн шийдвэрийн хүчинтэй хугацаанд багтаан энэ сарын 3-ны өдөр түүнийг баривчлах гэж оролдсон ч хатуу хамгаалалтаас нь болоод шийдвэрийг гүйцэлдүүлж чадаагүй юм. Харин өнөө өглөөний тусгай ажиллагаанд нийт 1000 орчим хүн дайчлагдан оролцжээ.
Юн Сок Ёль баривчлагдахынхаа өмнөхөн АТГ-ын мөрдөн байцаагчидтай хамтран ажиллана, гэхдээ өөрийг нь баривчлах тушаал хууль бус гэсэн утга агуулгатай гурван минутын бичлэг цацсан байна. Энэ мэдэгдлийнх нь хариуд Өмнөд Солонгосын Дээд шүүх болон Хууль зүйн яам Ерөнхийлөгчийг баривчлах шийдвэр ч, тусгай ажиллагаа ч хууль зөрчөөгүй хэмээн мэдэгджээ.
Тус улсын төрийн тэргүүний үүргийг одоогоор Гадаад хэргийн сайд Чой Санг Мок түр хавсран хариуцаж байгаа юм.
.avif)
