Канадын Торонто хотын Пирсоны нэрэмжит олон улсын онгоцны буудалд ослын буулт хийхдээ дугуй нь дээш харан унасан онгоцны ослоор 20-иод хүн бэртэж гэмтсэнээс гурвынх нь биеийн байдал хүнд байна. Америкийн “Delta Air Lines” компанийн уг онгоцонд 76 зорчигч, нислэгийн багийн дөрвөн гишүүн нийлсэн нийт 80 хүн явсан бөгөөд бүх хүнийг эсэн мэнд гаргасан гэж албаныхан мэдээлжээ. Онгоц Америкийн Миннесота мужийн нутгаас хөөрч, Торонтод газардах хуваарьтай байж. Гэхдээ яагаад ослын буулт хийсэн, цаг агаарын нөхцөл байдал ямархуу байсан зэргийг албаныхан нарийн тогтоохоор ажиллаж байна. Хэдийгээр сүүлийн хэдэн өдөр Торонтод цасан шуургатай, ширүүн салхитай байсан ч онгоц газардах үеэр салхины эрч сул байсан, буух зурвас хуурай байсан гэж Пирсоны онгоцны буудлаас мэдээлээд байгаа аж.
Хүнд бэртэл авч, эмнэлэгт хүргэгдсэн гурван хүний хоёр нь 40-60-аад насны эрэгтэй, эмэгтэй бол нэг нь бага насны хүүхэд гэнэ.
.avif)
