Украины Ерөнхийлөгч Володимир Зеленський гэрээг үзэглэхээр энэ баасан гарагт Вашингтонд айлчлах гэнэ. Хоёр орны дунд байгалийн баялгийн наймаа, тохиролцоо хийгдэх нь гэдгийг хамгийн анх мэдээлсэн Британийн “Financial Times” сонинд бичсэнээр гэрээний нарийн ширийн нь одоогоор тодорхойгүй байгаа авч анх яригдаж байсан газрын ховор металл болон Украины газрын тос, байгалийн хийн нөөцийг америкчуудад ашиглуулна гэсэн зүйл заалт гэрээнд тусаагүй байна. Яг ямар ордыг ашиглуулах, ямар ашигт малтмалыг америкчуудад нийлүүлэх нь гэрээг үзэглэсний дараа л тодорхой болох нь.
Гэрээний хариуд Украин улс юу хүртэх вэ гэсэн сэтгүүлчийн асуултад Америкийн Ерөнхийлөгч Дональд Трамп “350 тэрбум ам.доллар, зэр зэвсэг, бас улс орноо хамгаалан үргэлжлүүлэн дайтах эрх” хэмээн хариулжээ. Тэрээр америкчууд Украинд 300-350 тэрбум ам.долларын тусламж үзүүлсэн, энэ мөнгөө Америкийн ард түмэн эргүүлж авах хэрэгтэй гэж мэдэгдсээр байгаа юм. Гэхдээ Оростой гэрээлэхээс нааш зэр зэвсэг, цэрэг армийн тусламжаа үргэлжлүүлэх үгүйг эцэслэн шийдэж чадахгүй гэсэн байна. Украинчуудын байгалийн баялгийнхаа хариуд шаардаж байгаа аюулгүй байдлын баталгааг Орос, Америкийн эрх баригчид мөн удахгүй шат дараатайгаар хэлэлцэх гэнэ.
.avif)
