Их Британийн албаныхны мэдээлснээр Европ, Хамтын нөхөрлөлийн голдуу нийт 20 орчим улс Украинд туслах Сайн дурын эвсэлд нэгдэх хүсэлтэй байгаа аж. Гэхдээ эдгээр улс бүгд цэрэг армийн тусламж үзүүлэх боломжгүй тул өөр арга замаар туслалцаа үзүүлэхээ илэрхийлжээ. Олон улсын эвсэл байгуулах уг төлөвлөгөөг Их Британи, Франц ахалж байгаа бөгөөд одоогоор Европын орнууд болон Канад нийлсэн нийт 18 улсын Төрийн тэргүүн Украинд дэмжлэг үзүүлэхээ мэдэгдсэн байна.
Харин Британийн Ерөнхий сайд Кир Стармерийн дээрх мэдэгдлийн хариуд ОХУ-ын Гадаад хэргийн сайд Сергей Лавров Украинд цэрэг арми, зэр зэвсгийн тусламж үзүүлэх гэсэн ямар ч оролдлогыг Оросын эсрэг өдөөх НАТО-гийн албан ёсны, шууд өдөөн хатгалга гэж үзэх болно гэжээ.
Орос-Украины дайныг эцэслэх асуудлаарх АНУ-Украины ээлжит яриа хэлэлцээ ирэх долоо хоногт болохоор товлогдоод байна. Украины Ерөнхийлөгч Володимир Зеленський Америк хэдийгээр улс оронд нь үзүүлэх цэргийн тусламжаа зогсоож, тагнуулын мэдээ мэдээллээ дамжуулахаа больсон ч өмнөх уулзалтыг бодвол илүү үр дүнтэй уулзалт болно гэдэгт итгэлтэй байна гэжээ. Харин Британийн Ерөнхий сайд Зеленськийн мэдэгдлийн дараахан мөн адил итгэл найдвар тээж байгаагаа илэрхийлээд “Орос-Украины дайны асуудлыг хэрхэн шийдвэрлэхээс бүх Европын хувь заяа, 80 жил энхтайвныг сахин хамгаалж ирсэн Америк-Европын цаашдын харилцаа шалтгаана” гэдгийг онцолсон байна.
.avif)
