Тус улсын Ерөнхийлөгч Володимир Зеленський Орос-Украины дунд ямар нэг байдлаар энхийн гэрээ юм уу, гал зогсоох хэлцэл хийгдлээ гэхэд энхийг сахиулахад дор хаяж 200 мянган цэрэг хэрэгтэй, ингэснээр европчууд бие даан өөрсдийгөө хамгаалах бааз бүрдэнэ хэмээн онцолсон байна.
Тэрээр Швейцарийн Давост болж байгаа Дэлхийн эдийн засгийн форумд хэлсэн үгэндээ Цагаан ордны тэргүүнээр хоёр дахиа томилогдоод байгаа Дональд Трампыг цаашид яах бол гэж эргэлзэж, хүлээзнэхийн оронд өөрсдөө хүчээ нэгтгэж, Оросоос ирж болзошгүй аюулын өмнө бэлэн байх хэрэгтэйг сануулжээ.
Түүнчлэн холбоотны хүчний 200 мянган цэрэг гэдэг огтоос хангалтгүй тоо, байж болох хамгийн бага хувилбар нь энэ, Кремлийн эрх баригчдын шаардаж байгаачлан Украины Зэвсэгт хүчний албан хаагчдын тоог одоогийн 800 мянгаас нь цөөлж, тавны нэгд нь хүргэх ямар ч боломж байхгүй гэсэн байна.
Энэ даваа гарагт тангаргаа өргөж, үүрэгт ажилдаа орсон Дональд Трамп Орос-Украины дайныг даруй эцэслэнэ, түүний тулд талууд бие биедээ буулт хийж, тодорхой тохиролцоонд хүрэх хэрэгтэй гэж мэдэгдсээр байгаа юм. Тэрээр Украинд нийлүүлэх Америкийн тусламж, зэр зэвсгийг цөөлнө, багасгана гэж удаа дараа ярьсан тул Зеленськийг Европын орнуудтай илүү түншлэхийг зорьж эхэлсэн гэж ажиглагчид үзэж байна. Зеленськийн хэлснээр Оросын тал Украин руу 600 мянган цэрэг дайчлаад байгаа бол цаашдаа энэ тоо 1.5 саяд хүрэх магадлал өндөр гэнэ. Тэгвэл энэ нь Европ дахь хамгийн том арми болох юм.
.avif)
