Өмнөд Калифорнид дүрэлзэж байгаа хэд хэдэн түймрийг ахин хүчтэй салхи дэгдэхээс өмнө цурманд оруулах хэрэгтэй байна, үгүй бол байдал улам дордоно, түймэр бүр их газрыг хамрах ч эрсдэлтэй гэж албаныхан сэрэмжлүүллээ. Цаг агаарын урьдчилсан мэдээгээр Лос-Анжелесийн тойрогт ойрын өдрүүдэд хүчтэй салхи ахин дэгдэх төлөвтэй байгаа аж.
Бүтэн зургаан хоног тасралтгүй ассан хэд хэдэн түймэрт амь үрэгдсэн хүний тоо албан мэдээгээр 24-т хүрээд байна.
Гэхдээ арав гаруй хүн сураггүй байгаа, мөн шатаж сүйдсэн бүс нутгийг цэвэрлэх, заримыг нь нэгжих ажил эхлээ ч үгүй байгаа болохоор хохирогсдын тоо улам бүр нэмэгдэнэ гэж албаныхан анхааруулсаар байгаа юм. Дээрх 24 хүний 16 нь Ийтон, найм нь Палисадес дүүрэгт амиа алджээ.
Америкийн нийт есөн мужаас, мөн Канад, Мексикээс нэмэлт хүч ирж, Калифорнийн гал сөнөөгчдөд тусалж байгаа авч байдал дээрдэхгүй хэвээр байна. Ялангуяа Санта Анагийн гэх хуурай, хүчтэй салхи лхагва гаргийн орой хүртэл салхилна гэсэн мэдээ байгаа тул хамгийн их бүс нутгийг эзлээд байгаа Палисадес, Ийтоны түймрийг ахиад газар авахуулахгүй байхад гал сөнөөгчид анхаарч байгаа аж.
Сүүлийн мэдээгээр Өмнөд Калифорнийн нутагт асаж буй их, бага олон түймрээс гол гурван голомтод гамшгийн хэмжээнд хүрсэн түймэр асаж байна. Гэхдээ хэд хоногийн өмнөхтэй харьцуулахад Палисадесийн түймрийн 13, Ийтоны түймрийн 27 хувийг цурманд оруулжээ. Энэ удаагийн түймэр ганц Калифорни мужийн төдийгүй Америкийн түүхэн дэх хамгийн хор хохирол учруулсан түймэр болох нь баттай байна. “Accuweather” гэх нэгэн хувийн байгууллагын урьдчилсан таамгаар санхүүгийн хохирол нь одоогоор 250-275 тэрбум ам.доллар орчим болжээ.
.avif)
