Америкийн шинэ засаг захиргаа Украиныг дэмжих, Оросыг эсэргүүцэх Вашингтоны өмнөх байр сууриас ухарч, Оростой яриа хэлэлцээ хийж эхэлсэн билээ. Тэгвэл Цагаан ордны тэргүүн Дональд Трамп дайнд Украиныг буруутгаж, Ерөнхийлөгч Володимир Зеленськийг “дарангуйлагч” хэмээлээ. Зеленський Украины асуудлаар Саудын Арабад уулзалдсан Орос, Америкийн албаныхны уулзалтад Украиныг оролцуулаагүйг эсэргүүцэн, Трампыг Путиний бий болгосон “хуурмаг мэдээллийн ертөнцөд амьдарч байна” хэмээн шүүмжилсний хариуд Трамп дээрх мэдэгдлийг хийжээ.
Тэрээр Флоридад болсон Саудын хөрөнгө оруулалтын зөвлөгөөний үеэр хэлсэн үгэндээ “Зеленський ганц л юманд сайн, тэр нь Жо Байден мэтийн нөхдийн толгойг эргүүлэх” гэсэн байна.
Трампын Зеленськийг шүүмжилсэн үгийг, тэр дундаа “дарангуйлагч” хэмээснийг нь Европын эрх баригчид хатуу эсэргүүцэн, буруушаажээ. Германы Канцлер Олаф Шолц Украины Ерөнхийлөгчийг дарангуйлагч гэсэн нь “буруу бөгөөд аюултай юм” гэсэн бол Швед, Их Британийн эрх баригчид “утга учиргүй” хэмээн тодорхойлсон байна.
Трамп Америкийн зүгээс Украинд зэр зэвсэг, мөнгө санхүүгийн асар их дэмжлэг үзүүлсний хариуд Украины байгалийн баялаг, газрын ховор элементийг авах сонирхолтой байгаагаа удаа дараа мэдэгдсэн. Харин сүүлийн үед Зеленськийтэй илэрхий дайсагнах болсон нь Украины Ерөнхийлөгч ашигт малтмал, байгалийн баялгийн наймаа хийхээс татгалзсантай холбоотой гэж ажиглагчид үзэж байна.
.avif)
