Дональд Трамп АНУ-ын 47 дахь Ерөнхийлөгчийн тангараг өргөж, үүрэгт ажлаа албан ёсоор хүлээж авсан даруйдаа хийнэ, гүйцэтгэнэ гэж олонтоо мэдэгдсэн амлалтуудаа биелүүлж эхэллээ. Тэрээр Вашингтон хотын цэнгэлдэх хүрээлэнд, дэмжигчдийнхээ өмнө хэд хэдэн зарлигт шуудхан гарын үсэг зуржээ. Дараахан нь Зууван танхимд очсон даруйдаа мөн нэлээд олон зарлигт гарын үсэг зурсан байна. Түүний дотор 2021 оны нэгдүгээр сарын 6-ны 1600 орчим босогчийг өршөөж, Америкийн өмнөд хилд “үндэсний онц байдал” тогтоолоо.
Трампын цагаачлалын асуудлаар хийхээр удтал төлөвлөсөн дараагийн том алхам нь Америкийн нутагт мэндэлсэн шинээр төрөгсдөд эцэг эх нь гадаадын иргэншилтэй байхаас үл шалтгаалан шууд Америкийн иргэн болох эрх нээгддэг журмыг халах юм.
Тэрээр тангараг өргөсөн өдрөөсөө 30 хоногийн дараагаас эхлэн шинэ журам мөрдөх тухай хуулийн төслийг мөн үзэглэжээ.
Шинэхэн Ерөнхийлөгч мөн Америкийг олон улсын уур амьсгалын өөрчлөлттэй тэмцэх тунхаг буюу Парисын тунхагаас гаргах, Дэлхийн эрүүл мэндийн байгууллагаас гаргах тухай хуулийн төсөлд гарын үсэг зурлаа.
Түүнчлэн дийлэнх ажиглагчийн “галзуу, солиотой” гэж тодотгож байсан Мексикийн булангийн нэрийг Америкийн булан болгон өөрчлөх, Хойд Америкийн ноён оргил Деналийн нэрийг ахин МакКинли болгох зэрэг шийдвэрт гарын үсэг зурсан байна. МакКинли уулын нэрийг Барак Обамагийн шийдвэрээр 2015 онд өөрчилж байсан юм. Денали гэх нэр нь тухайн нутгийнхны уугуул хэлээрх нэршил тул ийм шийдвэр гаргаж байжээ. Гэхдээ энэ мэт нэр усны өөрчлөлтүүд зөвхөн Америкийн хил дотор л хамаарна, олон улсын нэршил нь одоохондоо өөрчлөгдөхгүй, хэвээр байх юм.
Өршөөлд хамрагдсан Капитол Хиллийн босогчдын тухайд дунд нь “Proud Boys” гэх хэт барууны үзэлт хөдөлгөөний хуучин гишүүд, үймээн дэгдээгчид байгаад олон нийт дургүйцлээ илэрхийлсээр байна. Ялангуяа хууль тогтоох байгууллагынхан Трампын шийдвэрийг “Америкийн цагдаа нарыг доромжилсон явдал боллоо” гэжээ.
Трампын эхний өдрийн бусад шийдвэрээс дурдвал Засгийн газрын бүтээмжийг нэмэгдүүлэх яам нэртэй шинэ яам байгуулах, спортын салбарт болон Зэвсэгт хүчинд трансжендер хүмүүсийг эмэгтэй хүн хэмээн үзэж элсүүлдэг журмыг цуцлах, TikTok-ийг Америкт хориглохыг түр хойшлуулах, 2020 оны сонгуулийн үеэр хууль дүрэм зөрчсөн гэх албаны хүмүүстэй хариуцлага тооцох зэрэг хуулийн төслийг зарлиг болгон баталжээ.
Трамп засаглалынхаа эхний өдөр өмнөх Ерөнхийлөгч Жо Байдений үеийн нийтдээ 78 хууль журмыг цуцалж, хүчингүйд тооцоод байна.
.avif)
