АНУ-ын Ерөнхийлөгч Дональд Трамп “Америкийн үнэт зүйлсийг эргэн харах цаг” хэмээн өөрийнхөө нэрийдээд байгаа засаглалынхаа эхэн үе буюу эхний 90 хоногт гадаад тусламжийн цувааг зогсоохоор шийдвэрлэжээ.
Энэ хугацаандаа тэрээр гадаад улс орнууд руу илгээж ирсэн Америкийн тусламжийн бараа, хүмүүнлэгийн үйлс нь өөрийнх нь шинэ засгийн бодлоготой уялдаж байгаа үгүйг нягталж шалгах гэнэ. Гэхдээ энэ даваа гарагт баталсан шинэхэн шийдвэр нь хэр олон улсад яг ямар хэмжээгээр, хэдэн сая хүнд нөлөөлөх нь одоогоор тодорхойгүй байна. Ерөнхийлөгчийн шийдвэр Конгрессоос хэдийн батлан хэрэгжүүлж байгаа одоогийн гадаадын тусламжийн тухай хууль журамд хамаарахгүй гэж ажиглагчид найдаж байгаа аж.
Трамп гадаадад үзүүлэх тусламжийг “үйлдвэрлэл” хэмээн нэрийдээд “Хүмүүнлэгийн гэх тодотголтой тусламж болгон тэр бүр Америкийн төрийн бодлогод нийцдэггүй, олон талаар Америкийн үнэт зүйлстэй харшилдаж ирсэн” гэсэн байна.
Америкийн шинэхэн Төрийн нарийн бичгийн дарга Марко Рубио мөн адил Сенат дахь Гадаад харилцаа эрхэлсэн хороонд хэлсэн үгэндээ “Бид бүгдийн зарцуулж байгаа доллар бүр, бидний санхүүжүүлж байгаа хөтөлбөр болгон, хэрэгжүүлэх гэж хичээх байгаа бодлогууд цөм дараах энгийн гурван асуулттай уялдах ёстой: Америкийг энэ илүү аюулгүй болгох уу? Илүү хүчирхэг болгох уу? Илүү хөгжүүлэх үү?” гэж онцолсон юм.
Шинжээчдийн тооцоогоор гадаадын тусламж өдгөө Украинд нийлүүлж байгаа хэдэн тэрбумын зэр зэвсэг мэтийн онцгой хангамж, туслалцааг эс тооцвол Нэгдсэн улсын холбооны төсвийн ганц хувьтай тэнцсээр иржээ. 2023 оны төсвийн жилд гэхэд Америкийн Засгийн газар байгалийн гамшгийн дараах нөхөн сэргээлт, эрүүл мэндийн үйлчилгээ, ардчиллыг дэмжих хөтөлбөр зэргээр дамжуулан нийт 204 улс орон, бүс нутагт 68 тэрбум ам.долларын буцалтгүй тусламж үзүүлсэн байна.
.avif)
